Бүх нийтийн бэлэн байдлын зэрэгт шилжсэнтэй холбогдуулан архи, согтууруулах ундааг худалдан борлуулахыг хориглоод байсан. Харин өнгөрсөн бүтэн сайн өдөр /2020.11.29/ Засгийн газрын хуралдаанаар 17-оос доош градустай согтууруулах ундааг Улаанбаатарт худалдаалахыг хэлэлцсэн талаар Шадар сайд Я.Содбаатар мэдээлж байсан юм. Мөн тэрээр "Бага градустай согтууруулах ундааг борлуулах шийдвэрийг Хотын дарга гаргана" хэмээн хэлсэн байдаг. 

Тэгвэл Хотын дарга Д.Сумъяабазар Нийслэлийн Онцгой комиссын хурлын үеэр өөрийн байр сууриа хүргэв. 

Тэрээр "Засгийн газрын хуралдааны үеэр дарс, шар айргийг худалдаанд гаргах талаар ярьсан. Зарах тодорхой шийдвэр гарсан мэтээр иргэд буруу ойлгосон. Үүнд тусгайлсан чиглэл нарийн зүйлс байхгүй. Энэ бол хотын шийдэх асуудал. Тодорхой баримт үндэслэл гаргаж байж шийднэ. Согтууруулах ундаатай холбоотой асуудал дээр нухацтай хандана.

Улаанбаатар хотыг өндөржүүлсэн бэлэн байдлын зэрэг рүү шилжүүлбэл үйлчилгээний байгууллагуудыг үе шаттайгаар нээх талаар ярилцаж байсан. Гэвч Улаанбаатар хот өндөр эрсдэлтэй учраас архи дарстай холбоотой шийдвэр гарах нь эрсдэлтэй байна. Иргэд хөл хорионы дэглэмд байгаа гэдгээ ойлгож ухаарах хэрэгтэй. Бид мэргэжлийн байгууллагаас гаргасан шийдвэрт хүндэтгэлтэй хандаж, саналыг нь хүндэтгэн үзэх хэрэгтэй. Хүн согтууруулах ундааг гэртээ ганцаараа уухгүй нь ойлгомжтой. Тиймээс энэ 10 хоногийн хугацаанд тэвчээртэй байхыг хүсч байна. Нөхцөл байдлыг ашиглах мөнгө олох гэсэн хүмүүс байгаад харамсаж байна" хэмээн ярив.