“Австралийн соёлын сар” арга хэмжээ Улаанбаатар хотноо зохион байгуулагдаж байна. Монголчуудад зориулсан Австралийн соёлыг түгээх, сурталчлах дөрвөн долоо хоногийн арга хэмжээ “Австралийн кино өдрүүд”-ээр үргэлжилж байна. 

Монгол улсад албан ёсоор зохион байгуулагдаж байгаа “Австралийн соёлын сар”-ын нээлт даваа гаригт боллоо. 

Нээлтийн үйл ажиллагаанд Монгол улсад суугаа Австралийн Элчин Cайдын Яамны Нэгдүгээр нарийн бичгийн дарга ноён Алекс Степан, Моззис Монгол-Австралийн Нийгэмлэгийн гүйцэтгэх захирал Л.Ариунаа болон Австрали-Монголын хамтарсан "Шат" богино хэмжээний киноны найруулагч, Ко-продюсер П.Золжаргал, Гол дүрийн жүжигчин Б.Даваасүрэн нар оролцлоо. 

Энэ үеэр Австралийн Элчин Cайдын Яамны Нэгдүгээр нарийн бичгийн дарга ноён Алекс Степан "Австралид төгсөгчдийн санаачлагаар “Австралийн соёлын сар” арга хэмжээг албан ёсоор нээж байгаадаа туйлын таатай байна. Дөрвөн үе шаттайгаар нэр сарын хугацаанд үргэлжлэх энэхүү үйл ажиллагаа маань Австралийн соёлын онцлогыг маш гүн гүнзгий тусгаснаас гадна хоёр орны хоорондыг харилцааг суртачлах зорилготой юм. Энэ дашрамд Австрали улсыг зорих оюутан залуусын тоо өсөн нэмэгдэж байгааг хэлэхэд таатай байна. Эдгээр төгсөгчид маань сурсан мэдсэнээ монголдоо ирж хуваалцаж, үйл ажиллагаа явуулж байгаа мөн талархаж байна. Манай хоёр улс нүүдлийн соёл иргэншилтэйгээрээ их төстэй, өргөн уудам нутагтай, газар зүйн хувьд ижил гээд төстэй талууд их байдаг" хэмээлээ.  

Кино өдрүүдийн нээлтийн үеэр "Шат" богино хэмжээний кино, “А гэвэл Аз жаргал” гэр бүлийн киног үзүүлсэн юм. 

Энэ долоо хоногт болж буй “Австралийн кино өдрүүд”-ээр Аustralia, Red Dogs, Ned Kelly, Crocodile Dundee, Paper planes, The Dish, Rabbit Proof Fence, The sapphires, Babe зэрэг кинонуудыг Австралийн Соёл Боловсролын Төв дээрээ сонирхсон хүмүүст нээлттэйгээр, үнэгүй гаргаж байна. 

Манай улсад Австралийн соёлыг судлах, сурталчлах арга хэмжээнүүд өмнө нь бага хэмжээгээр зохион байгуудагдаж байсан ч анх удаа бодитоор, өргөн хүрээнд болж байгаа нь энэ юм. 

Өнгөрсөн долоо хоногт Австралийн уугуул иргэдийн соёлын талаарх ойлголт өгөх, үндэсний онцлогийг илтгэн харуулах зорилготой “Австралийн уугуул иргэдийн уран зургийн долоо хоног” болж хүүхэд, залууст мэргэжлийн уран бүтээлч нар уран зургийн талаар зааж, үндэстний арга барилаар бүтээл туурвих боломж олголоо. Тухайн бүтээлүүдээр "Хүүхдийн номын ордон" байрлах "Австралийн соёл боловсролын танхим"-д үзэсгэлэн гарч байгаа юм. 

Түүнчлэн ерөнхий боловсролын сургуулийн 1-6 дугаар ангийн хүүхдийн дунд "Австрали орон миний төсөөллөөр" сэдэвт гар зургийн уралдаан, 7-12 дугаар ангийн сурагчдын дунд ижил сэдэвтэй англи хэл дээрх эссэ бичлэгийн уралдаан зарлалаа. Уралдаан оролцохыг хүссэн хэн бүхэнд нээлттэй гэдгийг дуулгахад таатай байна. 

Ийнхүү нэг сарын хугацаанд Австралийг тодорхойлох үндсэн дөрвөн чиглэлээр ажлуудыг зохион байгуулж байгаа бөгөөд ирэх долоо хоногт уран зохиолын, номын ертөнцөөр аялуулах аж.