Австралид Төгсөгчдийн Холбооны дэмжлэгтэйгээр Монгол улсад суугаа Австрали улсын элчин сайдын яам, Нийгмийн зөвлөх үйлчилгээний хүрээлэн, Моззис Монгол Австралийн Нийгэмлэг, Хүүхдийн төв номын сан хамтран АВСТРАЛИЙН СОЁЛЫН САР-ыг Улаанбаатар хотноо зохион байгуулж байна.

2020 оны Аравдугаар сарын 19-нөөс нэг сарын хугацаатай явагдах энэхүү арга хэмжээ үргэлжлэх юм. Энэ долоо хоногт Австралийн уугуул иргэдийн соёлын 7 хоног болж байна.

Австралийн уугуул иргэдийн соёлын талаарх ойлголт өгөх, үндэсний онцлогийг илтгэн харуулах уран зургийн үзэсгэлэн гарахын зэрэгцээ энэхүү арга хэмжээнд нийт 14 уран бүтээлч оюутан залуус хамрагдан Австралийн уугуул иргэдийн уран зургийн талаар судалж, заалган үндэсний арга барилаар бүтээл туурвилаа. 

Сургалтыг зааж буй СУИС-ын ДДУС-ын монументаль уран зургийн багш Г.Амгаланбаатар: “Австралийн абориген урлаг, үүсэл соёл болон түүний талаар арга ажиллагааг зааж, судалгаа болгон энэхүү үзэсгэлэнг гаргаснаар оюутнууд маань өөрсдийн зохиомжийг зургаар илэрхийлж байна”

Монументаль уран зургийн 4-р курсын оюутан С.Эрдэнэбилэг: “Бид дүрслэх урлагийн сургуулийн оюутнууд болохоор аль болох орон орны дүрслэх урлагийн мэдээлэл, судалгааны ажлуудтай танилцаж байх нь нэг ёсны үүрэг байдаг. Ялангуяа австралийн уугуул иргэдийн мэдээлэл бидэнд төдийлөн нээлттэй байдаггүй болохоор миний хувьд өнөөдөр нилээн мэдээлэл авч, сонирхолтой урлагт суралцсан, их үр өгөөжтэй үйл ажиллагаа болж байна”

Австралийн соёл урлагийн талаар судалсан оюутнууд маань цааш үргэлжлүүлэн дунд сургуулийн зурагт хайртай, зурах дуртай хүүхдүүдэд сурсан зүйлээ бататган хичээл заахдаа баяртай байгаагаа монументаль уран зургийн оюутнууд илэрхийлж байлаа.

Ийнхүү Австралийн Урлагийн 7 хоног энэ бүтэн сайн хүртэл буюу Аравдугаар сарын 25-ныг дуустал Хүүхдийн номын санд үргэлжлэх тул хүүхэд, залуус, ээж, аавуудыг өргөнөөр ирж сонирхохыг урьж байна.

АВСТРАЛИЙН СОЁЛЫН САР-ын албан ёсны нээлт 2020 оны Аравдугаар сарын 26-ны өдөр 17.00 цагт МУИС-ын Номын санд /5 давхарт/ болох бөгөөд энэ сарын хугацаанд Австралийн КИНО 7 хоног, Австралийн номын үзэсгэлэн, Австралийн Боловсролын 7 хоног зохион байгуулагдана.

Түүнчлэн ЕБС-ийн 1-ээс 6 дугаар ангийн хүүхдүүдийн дунд "Австрали орон миний төсөөллөөр" гар зургийн уралдаан, "Миний мэдэх Австрали орон" сэдэвт Эссэ бичлэгийн англи хэл дээрх уралдааныг 7-12 дугаар ангийн хүүхдүүдийн дунд зарлаж байгаа тул хүүхэд, багачууд идэвхитэй оролцохыг урьж байна!