Хонконгийн ерөнхий боловсролын сургууль төгсөгчийн их, дээд сургуульд элсэх элсэлтийн шалгалтыг дөрөвдүгээр сарын 24-25-ны өдрүүдэд зохион байгуулжээ.
Сурагчид маск зууж, биеийн халуунаа шалгуулан, эрүүл мэндийн мэдүүлэг бөглөж, 1.8 метрийн хоорондын зайтай байрлуулсан суудалд сууж шалгалтаа өгсөн байна.
Ерөнхий боловсролын сургуулиудад байрлах 350 шалгалтын байрнаас 51 нь дүрслэх урлагийн бичгийн шалгалтыг зохион байгуулжээ.
Шалгалтын явцад хяналт тавьсан эрх бүхий байгууллагын мэдээлж байгаагаар шалгалтад орохоор бүртгүүлсэн байсан 52 мянган шалгуулагчаас 298 хүн өвчтэй эсхүл шалгалтын өдөр Хонконгт байгаагүй, Хонконгийн их сургуульд элсэн орохгүй гэсэн шалтгаанаар шалгалтаа өгөөгүй байна. Халуунтай байсан 6 шалгуулагчийн 5 нь үүнийхээ улмаас шалгалт өгөх газарт огт ирээгүй бол 1 нь ирсэн хэдий ч түүнийг шалгалтын байранд нэвтрүүлээгүй байна.
Их, дээд сургуулийн элсэлтийн шалгалтыг гуравдугаар сарын 27-ны өдөр зохион байгуулагдах байсан боловч цар тахлын улмаас нэг сараар хойшлогдсон байсан. Тус улсад КОВИД-19 халдварын тохиолдол өдөр бүр нэмэгдэж байгаа ч гэсэн Хонконгийн Боловсролын газар элсэлтийн ерөнхий шалгалтыг зохион байгуулахаар шийдэж, олон улсын бакалавр, IGCSE (International General Certificate of Secondary Education - Дунд боловсролын олон улсын гэрчилгээ) зэрэг шалгалтыг цуцалсан.
Элсэлтийн шалгалт зохион байгуулагдах өдөр Хонконгт КОВИД-19 халдварын тохиолдол 1036 байсан бол энэ сарын 5-ны өдрийн байдлаар 1041 тохиолдол бүртгэгдсэн байна.
