Шинэ төрлийн коронавируст халдварын тохиолдол анх бүртгэгдсэн Хятадын Ухань хотын 57000 сурагч 76 хоногийн хатуу чанд хөл хорионоос гарч өчигдөр буюу тавдугаар сарын 6-ны өдрөөс сургуульдаа эргэн орсон байна.
Гэхдээ Ухань хотын бүх сурагчид танхимын сургалтад эргэн ороогүй, зөвхөн их, дээд сургуулийн элсэлтийн шалгалтад бэлтгэж байгаа ахлах ангийн сурагчид сургуульдаа явж эхэлжээ. Дунд болон бага ангийн сурагчдын танхимын сургалт эхлэх тов тодорхойгүй байгаа юм байна.
Сургуулиуд танхимын сургалт эхлэхтэй холбогдуулан нэг ангид хичээллэх сурагчдын тоог цөөлж, ширээ хоорондын зайг томсгож, сургуулийн орчинд ариутгал, халдваргүйжүүлэлт хийсэн байна. Мөн зарим сургуулиуд үүдний хэсэгтээ биеийн халуун хэмжигч дулааны сканер байрлуулж, халуунтай сурагчдыг сургуулийн орчинд нэвтрүүлэхгүй байх арга хэмжээг авч, багш, сурагчдын сургуульдаа ирэх цагийг тодорхой зааж өгчээ.
Энэ оны нэгдүгээр сараас хойш сургууль нь хаагдсан эсхүл цахим сургалтад шилжсэн байсан Хятадын бусад мужийн сургуулиуд дөрөвдүгээр сараас хойш аажмаар нээгдэж байгаа бөгөөд өнгөрсөн долоо хоногт Бээжин, Шанхай хотын сурагчид хичээлдээ явж эхэлсэн билээ.
