Баянгол дүүргийн эрүүгийн хэргийн анхан шатны шүүхээс НИТХ-ын дарга асан Ц.Сандуй болон МАН-ын гишүүн байсан А.Ганбаатар нарт тус бүр дөрвөн жилийн хорих ял оноосон билээ.

НИТХ-ын дарга асан Ц.Сандуй, МАН-ын гишүүн асан А.Ганбаатар нарт холбогдох эрүүгийн хэргийн давж заалдах шатны шүүх хуралдаан Нийслэлийн Эрүүгийн Хэргийн давж заалдах шатны шүүхэд өнөөдөр болж анхан шатны шүүхийг хуулийн хэрэглээний хувьд алдаатай, хуулийн зүйл заалтыг буруу тайлбарласан байна гэж үзээд хэргийг прокурорт буцаахаар шийдвэрлэлээ.

Хэрэг эцэслэн шийдэгдээгүй ба прокурорт энэ асуудлыг хэлэлцсэний дараа дахин шүүхэд шилжүүлэх эсэх нь тодорхойлогдоно. Тэд ял шийтгэлгүй болсон гэсэн утга биш харин хэргийг бүрэн гүйцэт шалгаагүй буюу зайлшгүй шалгах шаардлагатай асуудлууд байна гэж үзсэн учраас прокурорт буцааж байгаа аж. 

Шүүх хуралд А.Ганбаатар, Ц.Сандуй нарын өмгөөлөгчөөр М.Ариунболд, Б.Мэргэн, Э.Хашчулуун, Г.Мөнхбат, Т.Дэлгэрбаяр, Д.Дашдамба нар ажиллажээ.

Хэргийг сануулбал, Нийслэлийн прокурорын газраас А.Ганбаатар, Ц.Сандуй нарт холбогдуулан 2002 оны Эрүүгийн хуулийн тусгай ангийн 82 дугаар зүйлийн 82.1 дэх хэсэгт зааснаар “Төрийн эрх мэдлийг хууль бусаар авах хуйвалдаан зохион байгуулах” хэмээн эрүүгийн хэрэг үүсгэсэн юм.