Монгол Улсын Засгийн газар Япон Улстай хөдөө аж ахуйн салбарын тогтвортой хөгжлийг хангах, залуу үеийн оролцоог нэмэх, мэргэжлийн хүний нөөц бэлтгэх, мэдлэг, технологийн хамтын ажиллагааг өргөжүүлэхэд ач холбогдол өгч байна.

ХХААХҮЯ-ны Төрийн нарийн бичгийн дарга Т.Жамбалцэрэн Япон Улсын парламентын Төлөөлөгчдийн танхимын гишүүн Иноүэ Шинжи, Сакамото Рюүтаро, Сэто Такаказү, Япон Улсаас Монгол Улсад суугаа ЭСЯ-ны дэд тэргүүн Кондо Казүмасатай уулзан, ОИСКА-тай хамтын ажиллагаагаа бэхжүүлж, цаашид бодит ажил, тодорхой төсөл, үр дүнгээр баяжуулах хүсэлтэйгээ илэрхийлэв.

Тэрбээр Монгол, Япон Улс дипломат харилцаа тогтоосноос хойш 50 гаруй жил харилцан итгэлцэл, найрсаг харилцаа, хамтын ажиллагаагаа хөгжүүлж, “Энх тайван, хөгжил цэцэглэлтийн төлөөх Тусгай стратегийн түншлэл”-ийн түвшинд хүрснийг онцоллоо. Мөн хүнс, хөдөө аж ахуй, хөнгөн үйлдвэрийн салбарын бодлого, хийж буй ажлаа танилцуулж, “Хүнсний хувьсгал”, “Цагаан алт” үндэсний хөтөлбөр, салбарын хөгжилд Японы олон улсын хамтын ажиллагааны байгууллага ЖАЙКА-гийн дэмжлэг, хамтын ажиллагааны үр дүнг тодотгож, салбар хоорондын үр дүнтэй төсөл, хөтөлбөрийг нэмэх боломж байгааг хэллээ.

Японы парламентын Төлөөлөгчдийн танхимын гишүүд Японы парламентын ОИСКА бүлгэм нь Ази, Номхон далайн бүс нутгийн орнуудад мод тарих, байгаль хамгаалах, тогтвортой хөдөө аж ахуйг хөгжүүлэх, техникийн сургалт явуулахад дэмжлэг үзүүлдэг. Мөн хөгжиж буй орнуудын залуусыг Японд сургаж, хөдөө аж ахуй, техникийн мэдлэг, ур чадвар эзэмшүүлэх хөтөлбөр хэрэгжүүлдэг байна. “ОИСКА Монгол” ТББ-ыг Монголд 2007 онд байгуулснаас хойш 33 залууг Японд сургажээ.

ОИСКА цаашид залуусын мэргэжлийн ур чадварыг дээшлүүлэх, “Тоёота” үйлдвэрийн авто машины техникийн чиглэлээр мэргэжилтэн бэлтгэх боломжтойгоос гадна хөдөө аж ахуйд ухаалаг төхөөрөмж, шинэ технологи нэвтрүүлэх, хөрсгүй тариалалтын инновацыг хөгжүүлэх, ойжуулах чиглэлээр хамтын ажиллагааг өргөжүүлэх санал гаргасан байна.

Төрийн нарийн бичгийн дарга Т.Жамбалцэрэн саналыг хүлээн авч, хөдөө аж ахуйн салбарын хүний нөөцийн хөгжил, технологи, мэдлэгийн шилжилт, ажилчин солилцох, хөдөө аж ахуй, байгаль хамгааллын хамтын ажиллагааг урт хугацаанд хөгжүүлэх сонирхолтойгоо илэрхийлэв. Ялангуяа хөдөө аж ахуйн салбарт ажиллах шинэ үеийн мэргэжилтэн, залуу ажиллах хүч бэлтгэхэд ОИСКА болон Японы холбогдох байгууллагын туршлага, дэмжлэг авч, хамтран ажиллах хүсэлтэйгээ тэмдэглэжээ.

Япон Улсаас Монгол Улсад суугаа ЭСЯ-ны дэд тэргүүн Кондо Казүмаса хоёр улсын харилцаа, хамтын ажиллагаа амжилттай хөгжиж буйг онцолж, ХХААХҮ-ийн салбарт хэрэгжүүлсэн төслийн үр дүн, таван жилд 50 мянган мод ургуулах амлалтыг биелүүлсэн амжилтыг дурдаж, хоёр улсын харилцаанд “хүн төвтэй” хамтын ажиллагааг чухалчилж буйгаа илэрхийллээ.