УИХ-ын нэгдсэн чуулган үргэлжилж, УИХ-ын сонгуулийн тухай хуулийн төслийг хэлэлцэж байна. Уг хуулийн төсөлд "Сонгогч томсгосон мажоритари тойрогт нэр дэвшигчдээс нэг, өөрийн хамаарч буй жижиг тойргоос нэг, нийт хоёр нэр дэвшигчийг дугуйлах"-аар тусгасан нь гишүүдийн дунд маргаан дагуулаад байна. 

Энэ тохиолдолд томсгосон тойрогт тухайн намаас дэвшсэн бүх нэр дэвшигчийн авсан саналыг нэмээд, нийт авсан саналд нь дүйцүүлэн УИХ-д суудал хуваарилахаар бичсэн нь УИХ-ын гишүүн О.Баасанхүүг бухимдуулав. Хэлэлцүүлгийн үеэр хуулийн ажлын хэсгийн ахлагч, УИХ-ын дэд дарга Л.Энх-Амгалан "У.Хүрэлсүх гэдэг хүн 500 мянган хүний санал авч болно" хэмээн хэлсэн бөгөөд энэ тохиолдолд У.Хүрэлсүхийн авсан саналаар намынх нь нэр дэвшигчид шууд сонгогдох боломж бий болоод байгаа юм. Үүнийг О.Баасанхүү гишүүн "Нэг ч санал аваагүй нэр дэвшигч "намын авсан санал" нэрээр УИХ-д сонгогдох боломж байна" хэмээн шүүмжлэв. 

Харин ажлын хэсгийн ахлагч Л.Энх-Амгалан "Хуулийн төсөл хоёр хувилбартай явж байгаа. Томсгосон тойрогт 26 нэр дэвшигчийг дугуйлах боломж бий" хэмээн хариулсан авч СЕХ-ны дарга Ч.Содномцэрэн энэ тухайд "26 нэр дэвшигчийг дугуйлах нь нэр цаг хугацааны болоод техникийн хувьд боломжгүй" гэв. 

Мөн УИХ-ын гишүүн Д.Хаянхярваа "Бүх нэр дэвшигчдийн авсан саналын нийлбэр дүнгээр нэр дэвшигчдийг сонгогдсонд тооцно" гэсэн нь саяхан баталсан Үндсэн хуулийн нэмэлт өөрчлөлтөд тусгасан "шууд сонгох" зарчмыг үгүйсгэж байна. Үндсэн хуулиар хориглосон зарчмыг Сонгуулийн хуулиар хийж болохгүй" хэмээн шүүмжлэв. 

Хэлэлцүүлгийн эцэст УИХ-ын сонгуулийн тухай хуулийн төслийн хэлэлцэх эсэхээр санал хураахад гишүүдийн олонхи дэмжиж, эхний хэлэлцүүлэгт бэлтгүүлэхээр Төрийн байгуулалтын байнгын хороонд шилжүүллээ.