Өнөөдрөөс эхлэн багш нар орон даяар хугацаагүй ажил хаяхаа мэдэгдлээ. Гэхдээ энэ нь бүх багш нар гэсэн үг биш юм. Харин нийслэлийн таван дүргийн багш нарын хичээлийн эхний өдөр эхлүүлсэн ажил хаялтад бусад багш нар нэгдэж эхэлжээ. Өнөөдрийн байдлаар нийслэлийн 45 сургууль ажил хаялтад нэгдсэн, 33 цэцэрлэгийн багш нар нэгдэхээ мэдэгдсэн гэж Боловсрол, шинжлэх ухааны үйлдвэрчний эвлэлийн холбооны тэргүүн Б.Батзориг мэдээлжээ.
Дүүрэг байтугай, сургууль дотроо хоёр хуваагдчихаад байгаа ажил хаялтын үр дүн хэзээ гарч, сургуулиуд хэзээ хичээлээ эхлүүлэх нь тодорхойгүй. Ажил хаялтад оролцоогүй багш нарын хувьд авдаг цалин нь хатгасандаа бус, харин өнөөдрийг хүртэл авч байсан өчүүхэн бага цалингаа алдах вий, ажилгүй болох вий гэж айсандаа тэр. “Ажилгүй болгоно шүү, ажилд орж чадаагүй багш нар ард чинь зөндөө байна” гээд салбарын сайд нь заналхийлээд эхэлчихсэн шүү дээ. Уг нь энэ бүх хямрал зөрчилдөөнийг зохицуулах, Үйлдвэрчний эвлэлийн шаардлага, Засгийн газрын шийдвэр хоёрын дунд гүйх ёстой Боловсролын сайдтан олон нийтийн сүлжээгээр багш нараа намнаад завгүй.
Өнгөрсөн өдрүүдэд олон нийтийн сүлжээгээр тараасан мэдээллүүдээс үзвэл “Цогзолмаа сайд чанаргүй хувийн их, дээд сургуулиудтай сайн тэмцэж байгаа учраас түүнийг нь эсэргүүцсэн, их, дээд сургуулийг ивээлдээ авсан нөхдүүд багш нарыг хатгаж ажил хаяууллаа” гэх. Эсвэл “Багш нар цалингаа нэмүүлэхийн тулд биш, салбарынхаа сайдыг огцруулахын тулд ажил хаяжээ. Хүний нялх хүүхдээр улс төр хийхээ болиоч ээ” гэнэ. Ингэхэд багшийн цалин нэмэгдэхэд Боловсролын сайдын сандал суудал ямар хамаа байна аа. Хэмжээ хязгаараа алдсан хувийн сургуулиудтайгаа тэмцэх бол тэмцэнэ л бил. Төсвийн цалинтай хэдэн муу багш нартайгаа тэмцээд яахнав дээ.Тэмээ гэхээр ямаа ярьдгаа ядаж больчих хэрэгтэй юм даа, Цогзолмаа сайд аа!
Харин нөгөө тал арай үндэстэй, бодитой юм ярьж байна аа. Тухайлбал, өнгөрсөн хавар эмч, багш нар цалингаа нэмүүлэхээр жагсахад Засгийн газар “Монгол Улс 2017 оноос эхлэн ОУВС-гийн өргөтгөсөн санхүүжилтийн хөтөлбөрт хамрагдсанаар төрийн албан хаагчдын цалин, тэтгэмжийг Засгийн газар дур мэдэн нэмэх боломжгүй болсон” гэж мэдэгдсэн. Дараа нь ОУВС-гийнхантай ярилцаад 30 хувь хүртэл нэмэгдүүлэхээр боллоо гэсэн.
Гэтэл Засгийн газраас 2018 оны наймдугаар сарын 22-ны өдөр гурван талт хэлэлцээрийг зөрчиж, салбаруудын цалинг ялгавартайгаар нэмэх болсон байна. Төрийн албан хаагчид болон эрүүл мэндийн салбарынхны цалин хөлсийг 8-30 хүртэл хувиар, соёл урлагийн салбарынхны цалинг 8-27 хувиар нэмэгдүүлж, БСШУ-ны салбарын цалинг 8-12,3 хувиар нэмэх шийдвэр гарсан. Үүнийг нь Монголын боловсрол шинжлэх ухааны үйлдвэрчний эвлэлийн холбооноос эсэргүүцэж ажил хаялтыг зохион байгуулж байна гэв.
Ажил хаяхын өмнө МҮЭХ-ны зүгээс “Инфляцын түвшин 40 гаруй хувиар нэмэгдээд байхад 8-12,3 хувиар цалин нэмэх шийдвэрийг бидний зүгээс хүлээн зөвшөөрөхгүй. Бидний зүгээс нэг минут ч алдалгүй зөвшилцөлд хүрэхэд бэлэн байна” гэдгээ Засгийн газарт мэдэгдсэн байна. Харин Засгийн газар нүдээ аниад өнгөрөөсөн, чигээрээ зүтгэсэн. Бодит байдал гэвэл энэ.
Гэтэл багш нарынхаа талд зогсох ёстой Боловсролын сайд нь багш нарынхаа дайсан болчихсон сөрөг пиар хийгээд, “тэмээ гэхээр ямаа” яриад сууж байдаг. Ингэхэд багшийн цалин Боловсролын сайдад хамаагүй юм бол Боловсролын сайдад өөр юу хамаатай байх вэ? Хүүхдэд боловсрол олгох нь багшийн үүрэг юм бол түүнд нь тохирсон цалин хөлсийг олгох нь төрийн үүрэг. Зөвхөн нэг тал нь үүрэг хүлээгээд нөгөө тал нь үүрэг хүлээдэггүй байж болох уу? Багшийн цалинг нэмэхээс мөнгөө харамлаж буй төр тэднээс өндөр боловсрол, ёс суртахуун нэхэх эрхтэй юу?
Эцэст нь сануулахад сургууль, боловсролоос мөнгөө харамлавал дараа нь шорон барихад мөнгөө үрэх хэрэг гарна гэж үг бий. Ардчиллын жилүүд дэх Монголын хамгийн шилдэг улстөрчөөр тодорсон Хууль зүй, дотоод хэргийн сайд Ц.Нямдорж саяхан тавьсан илтгэлдээ “Монгол улс шорон барихаас мөнгөө харамлахгүй болсон” талаар бахархалтайгаар ярьсан байна лээ. Харин Боловсролын сайд ажлаа яаж хийгээд байна аа?
Б.СЭМҮҮН
Холбоотой мэдээ...
Сэтгэгдэл (3)