БНХАУ-д нийлүүлэх уул уурхайн бүтээгдэхүүний экспорт, бүтээгдэхүүний тээвэрлэлтийн талаар УБТЗ ХНН-ээс мэдээлэл хийлээ.
Тээвэр зохион байгуулалтын албаны дарга Ц.Лувсан "Монгол Улсаас БНХАУ руу экспортод гардаг байсан тодорхой нэр төрлийн ачаанд цар тахлын улмаас арваннэгдүгээр сарын 28-наас хориг тавигдсан. Үүнээс хойш уулын баяжуулах Эрдэнэт үйлдвэр дээр 95 орчим мянган тонн зэсийн баяжмал хуримтлагдаад байсан. Энэ асуудлыг шийдвэрлэхээр холбогдох төрийн байгууллагууд Хятадын талтай хамтран ажилласан. Хоёрдугаар сарын 11-нээс хойш 1,200 орчим вагоноор 85 орчим мянган тонн зэсийн баяжмалыг Хятадын талд хүлээлгэн өгч, хуримтлагдсан байсан баяжмалуудыг үндсэндээ тээвэрлэж дууссан.
Харин нүүрсний тээврийн тухайд тээвэрлэлт хүндрэлтэй хэвээр байна. Хятадын тал зөвхөн open top буюу дээвэр нь задгай чингэлэгт ачсан нүүрсийг л хүлээн авч байгаа. Харин хориг тавихаас өмнө задгай 1,200 вагонд нүүрс ачсан байсан. Үүний 350 вагоныг нь хүлээлгэж өгсөн. Нүүрстэй 850 вагон арваннэгдүгээр сарын 28-наас хойш зогсож байна" гэв.
