"Эрдэнэс Тавантолгой" ХК-ийн Гүйцэтгэх захирал Б.Ганхуяг "Жишиг үнэ ба Ашигт малтмалын нөөц ашигласны төлбөр" хэлэлцүүлэгт оролцлоо. 

Тэрээр "Ковидоос дутахгүй хоёр дахь дарамт нь АМНАТ болсон. Манай компани энэ оны хоёрдугаар улиралд нэг тонн коксжих нүүрсийг 83 ам.доллароор борлуулахад 260 гаруй ам.доллар буюу 259 хувь өндөр АМНАТ ногдсон. Мөн бид аравдугаар сарын 20-ноос хагас коксжих болон эрчим хүчний нүүрсний борлуулалтыг зогсоосон. 13-14 ам.доллароор борлуулчхаад 15 ам.долларын ашигт малтмалын нөөц ашигласны төлбөр төлөх нь бизнес биш. Олборлож гаргахын тулд ч зардал гаргаж байгаа. Зөвхөн зардал гаргахын тулд бизнес хийнэ гэдэг бол субботник л юм.

Коксжих нүүрсний байдал хүнд байна. Эрдэнэс Тавантолгой ХК нийт 2.4 их наяд төгрөгийг улсад төвлөрүүлсэн байдаг. Үүний 2.2 их наядыг сүүлийн дөрвөн жилд төвлөрүүлсэн. Өндөр ачаалал авч байгаа.

Бүх төрлийн татвар хураамжаа төлж байна. Үүн дээр нэмээд нийгмийн хариуцлага, цар тахлын нөхцөл байдал хүндэрсэн тул компани их хэмжээний зардлыг хувьцаа эзэмшигчдийнхээ сайн сайхны төлөө, төрөөс өгсөн чиг үүргийг хэрэгжүүлж ирсэн.

Давхар АМНАТ-ын дарамт авч болохгүй. Юманд учиртай байх ёстой. Харилцан ашиг олох гэж байгаа гэдэг утгаар биш, хэрэв төр татвар хураамжаа авах гэж байгаа бол татварын шударга, эн тэнцүү зохицуулалттай байх ёстой. Хэдийгээр АМНАТ 10% гэдэг ч жишиг үнээр тооцоход 34-37 хувийн татвар төлж байна" гэсэн юм.