Хууль зүйн сайд Ц.Нямдорж өчигдөр Эрүүгийн хууль болон Гэрч, хохирогчийг хамгаалах тухай хуульд нэмэлт, өөрчлөлт оруулах тухай хуулийн төслийг УИХ-ын дарга Г.Занданшатарт өргөн барьжээ.

Түүний өргөн барьсан Эрүүгийн хуульд гэмт хэргийн хөөн хэлэлцэх хугацааг тооцох асуудлыг өөрчлөн тусгасан байна. Тодруулбал, 2015 онд баталсан Эрүүгийн хуулиар хэргийг шалгаж эхэлснээр хөөн хэлэлцэх хугацааг зогсоодог байсныг МАН 2017 онд өөрчлөлт оруулж, хэргийг шалгаж байх явцад ч /анхан шатны шүүхийн шийдвэр гарах хүртэл/ хөөн хэлэлцэх хугацааг тоолохоор болсон билээ. 

Харин Ц.Нямдорж сайдын өчигдөр өргөн барьсан төсөлд хөөн хэлэлцэх хугацааг өмнөх 2015 оных руу нь эргүүлж оруулахаар тусгажээ. Өөрөөр хэлбэл, нэгэнт гэмт хэргийг шалгаж эхэлсэн бол хэдэн жил ч шалгасан хөөн хэлэлцэх хугацаа тооцохгүй, ингэснээр гэмт хэрэгтэн ял завших боломж гарахгүй гэсэн үг.

Гэвч харамсалтай нь уг хуулийн өөрчлөлт хууль батлагдсанаас хойш үйлдэгдсэн гэмт хэргүүд дээр л үйлчилнэ. Өөрөөр хэлбэл, хууль хэдий хурдан батлагдлаа ч гэсэн "Жаст"-ын Г.Батхүү, Ч.Ганзориг нарын хэрэг дээр шинэ хуулийн заалтыг хэрэглэхгүй. Тэр тусмаа Ш.Батхүү нарын хэргийн хөөн хэлэлцэх хугацаа шүүхийн шийдвэрт хүрэлгүйгээр дуусч байгаа. Анхан шатны шүүх хэргийг шийдвэрлэхгүй буцаасаар байсан нь ийм учиртай.

Тиймээс "шударга ёсны" сайдын энэ шударгуу байдал "оройтсон борооны араас цув нөмрөх"-тэй адил  болжухуй хэмээн халаглах хүн олон байна.

Б.ЗАЯА