БСШУС-ын сайд Ё.Баатарбилэгт хандаж, АШУҮИС-ийн доктор, профессорууд, нэр бүхий багш нар албан бичгээр шаардлага хүргүүлжээ. Уг шаардлагыг хүргүүлэх болсон шалтгаан нь  Ё.Баатарбилэгийн өмнө алба хашиж байсан БСШУС-ын сайд Ц.Цогзолмаа АШУҮИС-ийн захирлаар ажиллаж байсан Г.Батбаатарыг  үндэслэлгүйгээр ажлаас чөлөөлж, Эрүүл мэндийн дэд сайд асан Ж.Цолмонг томилсон.

Үүнээс үүдэж захирал асан Г.Батбаатар шүүхэд гомдол гаргаж гурван шатны шүүхээр түүнийг  үндэслэлгүй халсан нь тогтоогдсон. Шүүхийн шийдвэр энэ оны  дөрөвдүгээр сарын 25-д гарч, долдугаар сарын 2-ны өдөр Г.Батбаатарыг үүрэгт ажилд нь эгүүлэн томилох  шийдвэрийг албадан биелүүлэх шүүгчийн захирамж хүртэл гарсан юм байна.

Тиймээс тус сургуулийн багш нар  өнгөрөгч долоо хоногт Ё.Баатарбилэг сайдад  албан шаардлага хүргүүлж, шүүхийн шийдвэрийг биелүүлэхийг хүсчээ. БСШУС-ын сайд Ё.Баатарбилэг хэрвээ шүүхийн шийдвэрийг хүндэтгэж, шударга ёсыг баримталдаг бол АШУҮИС-ийн эрдэмтэн багш тавьсан шаардлагыг яаралтай шийдвэрлэж. С.Батбаатарыг албан тушаалд нь эргүүлэн томилох биз. Үндсэн хуульт ёсонд "шүүх эцсийн шийдвэрийг гаргана" гэдэг болохоор салбарын сайд байтугай төрийн тэргүүн нь түүнийг дагаж мөрдөх учиртай гэдгийг эрхэм сайдад сануулах юун. 

Жич: Ё.Баатарбилэг сайдад хаягласан албан бичгийг бүрэн эхээр нь хуулбарлан оруулав.

Улсын их хурлын гишүүн, МУ-ын Засгийн газрын гишүүн, Боловсрол, Соёл, Шинжлэх ухаан, Спортын сайд Ё.Баатарбилэг танаа

2019 оны 9 сарын 10-ны өдөр

Таны энэ өдрийн амгаланг айлтгахын ялдамд Монгол улсын ирээдүй болсон мянга мянган хүүхэд багачууд оюутан залуус, багш сурган хүмүүжүүлэгч, судлаач эрдэмтэдийг Монгол улсын Засгийн газарт төлөөлөн нийгмийн нэн чухал энэ салбарын хөгжил дэвшил, шинэчлэлийн төлөөх их ажилд тань амжилт хүсье.

Өмнөх Засгийн газрын үед буюу 20018 оны 7-р сард АШУҮИС-ийн захирал профессор Г.Батбаатарыг БСШУС-ын сайдын тушаалаар өөрчилж, Ж.Цолмонг захиралын үүрэг гүйцэтгэгчээр томилсоныг Та мэдэж байгаа байх. Энэ томилгоо нь хуулийн үндэслэлгүй болохыг Монгол улсын гурван шатны шүүх тогтоож, профессор Г.Батбаатарыг албан тушаалд нь эргүүлэн томилох шийдвэр гаргасан ба шүүхийн энэ шийдвэрийг албадан гүйцэтгэх захирамж ч гарсан байна.

Иймд хууль тогтоогч, засгийн газрын гишүүн таныг шүүхийн шийдвэр ба захирамжийн дагуу АШУҮИС-ийн захирал профессор Г.Батбаатарыг албан тушаалд нь буцаан томилох шударга шийдвэр гаргана гэдэгт гүнээ итгэн хүсч энэхүү захидлыг хүргүүлж байна.

Гүнээ хүндэтгэсэн:

• АШУҮИС-ийн Анагаах ухааны сургуулийн багш
• Монгол Улсын Ардын эмч,
• Анагаах ухааны доктор, профессор                                            Д.Малчинхүү
• Монгол Улсын Ардын эмч,
• Анагаах ухааны доктор, профессор                                            Ж.Баасанхүү
• АШУҮИС-ийн Биоанагаахын сургуулийн багш
• Монгол улсын Гавьяат багш,
• Биологийн ухааны доктор, профессор                                       И.Пүрэвдорж
• Анагаах ухааны доктор, профессор                                            С.Цогтсайхан
• Анагаах ухааны доктор, профессор                                            Ж.Сарантуяа