Шүүх Ерөнхий сайд асан Н.Алтанхуягийн нэр хүндийг нэг сая төгрөгөөр үнэлжээ.
Тодруулбал, сар орчмын өмнө Ерөнхий сайд асан Н.Алтанхуяг экс Ерөнхийлөгч Ц.Элбэгдоржийг шүүхэд өгсөн тухайгаа өөрийн твиттер хуудсаар жиргэсэн байдаг. Ингэхдээ "Шинэчлэлийн Засгийн газраа огцруулаад өгөөч гэж өргөдөл өгсөн мэтээр намайг гүтгэсэн Ц.Элбэгдоржийг шүүхэд өглөө. Түүний мэддэг тооны нэгж нь тэрбумаас эхэлдэг учир нэг тэрбум төгрөг нэхэмжиллээ. Энэ мөнгийг түүний бий болгосон шударга бусын хонгилыг нураахад бүрэн зарцуулна" гэсэн билээ.
Тэрбум төгрөгийн нэхэмжлэлтэй нэр төр сэргээх шүүх хурал өнгөрөгч наймдугаар сарын 28-нд болж, Ц.Элбэгдоржийг Н.Алтанхуягийн нэр төрд халдсан мэдээллийн хэмжээгээр залруулах үүрэг өгч, Ц.Элбэгдоржоос нэг сая төгрөг гаргуулж Н.Алтанхуягт олгохоор шийдвэрлэсэн байна. Гэвч Сүхбаатар дүүргийн иргэний хэргийн анхан шатны шүүхээс гаргасан энэ шийдвэрийг экс Ерөнхий сайд давж заалдах бодолгүй байгаа бололтой.
Тэрээр шүүхийн шийдвэрийг хүлээн авсны дараа буюу өчигдөр өөрийн цахим хуудсаар "Ц.Элбэгдорж намайг гүтгэснийг шүүх тогтоолоо. Ийм л худалч хүн дээ" хэмээн жиргэсэн байна.
Б.ЗАЯА
Сэтгэгдэл (1)