УИХ-ын ээлжит бус чуулганаар Үнпсэн хуульд оруулах нэмэлт өөрчлөлтийн хоёрдугаар хэлэлцүүлэг үргэлжилж байна.

УИХ-ын Дэгийн тухай хуулийн 14.3, 14.4 дэх хэсэгт Шаардлагатай бол саналын нэг томъёоллоор гурван удаа санал хурааж болно гэж заалтыг үндэслэн Үндсэн хуулийн дөчин зургадугаар зүйлийн 46.4 дэх хэсгийн төрийн албаны мэргэшсэн, тогтвортой, хараат бус байдалтай холбоотой зохицуулалтад Ерөнхийлөгчийн зүгээс төрийн жинхэнэ албан хаагч яамны Төрийн нарийн бичгийн дарга хүртэл дэвшин ажиллах эрхтэй бөгөөд шатлан дэвших, чадахуйн зарчимд үндэслэсэн сонгон шалгаруулалтын болзол хангасан Монгол Улсын иргэн Төрийн нарийн бичгийн даргад чөлөөтэй өрсөлдөх, Төрийн нарийн бичгийн даргыг 10 жилийн хугацаагаар томилохоор тусгасан заалтад дахин санал хураалт явуулах саналыг УИХ-ын гишүүн С.Чинзориг гаргав.

Тэрбээр, Монгол төрийн босго өндөр байх ёстой гэж би боддог. Монгол төр чадамжгүй байна гэж иргэд их шүүмжилдэг. Энэ бүхэн бол төрийн албыг тогтвортой бөгөөд мэргэшсэн, ёс зүйтэй, хариуцлагатай байх гэсэн үндсэн зарчмуудаас улбаатай.

Энэ хуулийн заалт орсноор Монгол төрийн албан хаагчийн мэргэшсэн байх чадавхийн зарчим болоод шатлан дэвших зарчим үйлчлэх асуудал шийдэгдэнэ. Тиймээс 12.1 дэх заалтад дахин санал хураалт явуулж, дэмжиж өгөхийг хүсэж байна" гэсэн юм.

Энэхүү саналтай холбоотойгоор гишүүд саналаа хэлэв.

УИХ-ын гишүүн Ж.Бат-Эрдэнэ "Монгол Улсын төрийн үйл ажиллагаа зөв байхын гол үндэс нь төрийн албан хаагчид. Өнөөдрийн байдлаар ур чадвар нь буурсан, шатлан дэвших гэсэн зарчмыг харж өдөр хоногоо өнгөрөөсөн хандлага бий.

Улс төрийн сонгууль дээр намууд өөрсдийнхөө хүмүүсийг дотор нь оруулж суулгадаг. Тэр нь төрийн мэргэшсэн албан хаагчдыг ажил хийх боломжгүй болгодог. Гол нь төрийн албан хаагчид тогтвортой ажилладаг байх, тухайн салбартаа мэргэшсэн чадварлаг байх явдал нь Монгол Улсын төрийн тогтвортой байдлын үндэс суурь учраас заавал энэ заалтыг дахин нэг хармаар байна" гэлээ.

УИХ-ын гишүүн Н.Учрал "Монголын Улсын төрийн албанд орох залууст "шатлан дэвших" гэсэн үгийг Үндсэн хуульд оруулах юм бол би ёстой уучлаарай гэж хэлнэ. Шатлан дэвших гэдэг үгийг энэ заалтаас хасахгүй бол би энэ хуралдаанд суухгүй. Намын бүлгийн шийдвэр надад хамаагүй. Учир нь Монголын мянган залуус энэ төслийг харж байгаа" гэв.

Шатлан дэвших гэсэн үгийг хасаж, гуравдугаар хэлэлцүүлэгт өөрчлөн найруулах чиглэл өгсөн ч санал хураалтаар дэмжигдсэнгүй.

Мөн төслийн 3 дугаар зүйлийн 6 заалт буюу 39 зүйлийн 1 дэх хэсгийг "Засгийн газар Ерөнхий сайд болон гишүүдээс бүрдэнэ. Ерөнхий сайд болон Засгийн газрын 4-өөс илүүгүй гишүүн УИХ-ын гишүүний албан тушаалыг хавсарч болно" гэж өөрчлөн найруулахад санал хураалт явуулахад 95.1 хувиар дэмжигдэв.