Японы мэргэжлийн сумо бөхийн 41 дэх аварга Хакухо Даваажаргал Япон улсын иргэншлээ авчээ. Их аварга маань зодог тайлсны дараа өөрийн дэвжээг байгуулж, залуу бөхчүүдийг дасгалжуулахаар төлөвлөж байгаа тухайгаа ярьж байсан юм.

Түүний иргэншлийн талаар Японы Засгийн газар өнөөдөр буюу мягмар гаригт мэдээлжээ. Өдгөө 34 настай тэрбээр хамгийн олон буюу 42 башёд түрүүлсэн юм.

Японы Сүмо бөхийн холбооны дүрэм журмын дагуу дэвжээ байгуулах хүсэлтэй гадаадын сүмочид Японы иргэншил авах шаардлагатай байдаг аж. Өмнө нь АНУ-ын иргэн, Ёкозүна асан Мүсашимарү болон Монголын сүмоч Кёкүтэнхо нар өөрийн дэвжээг байгуулахын өмнө Японы иргэншил авч байжээ.

Ийнхүү Их аварга Хакухо М.Даваажаргал өөрийн дэвжээг байгуулах боломжтой боллоо.

Дашрамд, Японы мэргэжлийн сумо бөхийн 41 дэх аварга М.Даваажаргал Монгол Улсын иргэншлээс татгалзах хүсэлтээ өнгөрөгч дөрөвдүгээр сард гаргаж, түүний хүсэлтийг Ерөнхийлөгч Х.Баттулга зургаадугаар сарын 27-нд хүлээж авсан юм.