Ерөнхийлөгчийн тамгын газрын дарга З.Энхболд өчигдөр хэвлэлийнхэнд яриа өгчээ. Асуудал нь ахиад л нөгөөх гайтай хөөтэй допинг...
Энэ жилийн наадмын шөвгийн 16-д үлдсэн бөхөөс допингийн шинжилгээ авахад хоёроос нь допингийн төрлийн бодис илэрсэн тухай Үндэсний бөхийн салбар хороо мэдээлсэн. Гэвч Б сорьцын шинжилгээ авч, шинжилгээний хариу ирэхээс нааш бөхчүүдийн нэрийг зарлахгүй гэсэн билээ.
Харамсалтай допинг илэрсэн хоёр бөхийн нэг нь шинэ аварга Э.Оюунболд болж таарав. Наадамчид сэтгэл гундуу байна. Мань хүн ч гэсэн яаж дуугуй өнгөрөх вэ, "миний шээсийг сольчихсон байна" гэж балайрлаа. Гэсэн ч хоёр дахь шинжилгээний хариу эхний шинжилгээний дүнг баталгаажуулсан билээ.
Тиймээс хуулийн дагуу Э.Оюунболдын цолыг хурааж, удаалсан бөхөд аварга цолыг өгөх ёстой. Харин ЕТГ-ын дарга З.Энхболд өчигдөр энэ асуудлаар ямар ч шийдвэр гаргахгүй гэдгээ өчигдөр сэтгүүлчдэд хэллээ. Тэр Э.Оюунболд аваргыг шүүхээр явж, шүүхийн эцсийн шийдвэр гартал хуруугаа ч хөдөлгөхгүй гэв. Учир нь Ц.Элбэгдорж Ерөнхийлөгчийн үед бас допингийн асуудлаар цолоо хураалгах болсон нэг бөх 2-3 жил дамжуулан шүүхдэж явсаар сая нэг шийдэгдсэн гэнэ.
Гэвч шүүхээр явах эсэх нь тухайн бөхийн асуудал. Харин Ерөнхийлөгчийн хувьд улсын наадмын төрүү бөх допинг хэрэглэсэн гэдэг шинжилгээний хариу гарсан даруйд цолыг нь хураах ёстой. Гэтэл цөөд бөх нь шүүхэд гомдол гаргаагүй байхад өмнөөс нь "шүүхээр явдаг юмаа" гээд учирлаад байгаа З.Энхболд дарга хэний тал вэ?
Б.ЗАЯА
Сэтгэгдэл (7)