Хуралдаанд 52 гишүүн оролцож байгаагаас УИХ-ын гишүүн Н.Амарзаяа Х.Болорчулуун, А.Ундраа, Ж.Ганбаатар, Д.Хаянхярваа, Ц.Даваасүрэн, Л.Болд, Н.Номтойбаяр, С.Жавхлан, Ч.Улаан, Б.Жавхлан нар одоогоор чуулганы хуралдаандаа хүрэлцэн ирээгүй тул УИХ-ын дарга тэдний нэрсийг зарлалаа. Нийт 57 гишүүн оролцож байж Үндсэн хуулийн нэмэлт, өөрчлөлтийг хэлэлцэх учиртай.

УИХ дахь АН-ын зөвлөлийн гишүүд чуулганд оролцохгүй гэдгээ мэдэгдсэн. Харин УИХ-ын гишүүн О.Баасанхүү Үндсэн хуулийн нэмэлт, өөрчлөлт оруулах тухай хуулийн төсөлд орж буй зарим заалтуудыг ард түмнээсээ асуухыг шаардаж, мөн Үндсэн хуулийн өөрчлөлтийг улс төрийн тохиролцоо наймааны хэрэгсэл байлгахаа зогсоо гээд УИХ-ын чуулганы танхимын үүдэнд самбар байршуулжээ. О.Баасанхүү гишүүний хувьд,

-УИХ-ын гишүүдийн тоог 99 болгож нэмэх эсэх,

-Сонгуулийн тогтолцоог холимог системээр явуулах нь зөв эсэх,

-Шүүхийн хараат бус байдлыг хангах зорилгоор Шүүхийн ерөнхий зөвлөлийг УИХ болон Ерөнхийлөгчийн оролцоотойгоор бүрдүүлэх нь зөв эсэх,

-УИХ-ын гишүүдийн бүрэн эрхийн хугацааг таван жилээр болгох эсэх,

-Байгалийн баялгийн стратегийн ач холбогдол бүхий 51 хувь дээр түшиглэн баялгийн сан бүрдүүлэх нь зөв эсэхийг ард түмнээсээ асуухыг шаардсан байна.