Монгол Улсын Ерөнхийлөгчийн Хүний эрхийн бодлогын зөвлөх Г.Уянга Тэргүүн хатагтайг чонотой зүйрлэжээ. Ижил тэнгэртэйдээ харагдаж, илүү тэнгэртэйд нь баригддаг, дутуу тэнгэртэйд харагддаг ч үгүй бүсгүй байдаг гэнэ. Г.Уянга зөвлөх энэ үгээрээ яг юу хэлэх гэсэн нь ойлгомжгүй. Төрийн тэргүүнээ даапаалаад байгаа юм уу, төдийгөөс өдий хүртэл тэргүүн хатагтайнхаа барааг хараагүй яваа ард түмнээрээ даажигнаад байна уу?

Үнэн гэвэл өнгөрсөн удаагийн Ерөнхийлөгчийн сонгуулиар нэр дэвшигч Х.Баттулга эхнэрээ дагуулахын оронд анхны эхнэрээсээ гарсан том охиноороо нүүр хийж явсаар сонгууль дуусгасан. Пиарчид нь нэр дэвшигчийнхээ энэ “имиж”-ийг Трамп, Иванка нарын хослолтой зүйрлэсэн билээ. Харин Трампаас ялгаатаатай нь манай хүн төрийн тэргүүнээр сонгогдож тангараг өргөснөөсөө хойш нэг ч удаа хууль ёсны эхнэрээ /хэрвээ тэд гэрлэлтийн баталгаатай бол шүү дээ/ олны өмнө харуулаагүй. Ямар ч байсан Х.Баттулгатай суугаад дөрвөн хүүхэд гаргасан, орос-чечень гаралтай бүсгүй байдаг гэдгийг л олны хэлээс хальт сонссон. Тэр байтугай Ерөнхийлөгчийнхөө хөвгүүдийн нэрийг ч бид мэдэхгүй.

Харин Ерөнхийлөгчийн зөвлөх бүсгүй энэ тухай “Нээх л олон эхнэр нэхсэн хүмүүс. Барааг нь хараад үхмээр байна л гэнэ, яасан ч хямдхан амь байдаг юм. Төрийн тэргүүнээсээ арай өөр юм нэхээч” хэмээн өөрийнх нь хэлснээр “хөнгөхөн наргижээ”

Б.ЗАЯА