ТЕГ-ын дарга асан Б.Хурц нарт холбогдох эрүүгийн хэргийн шүүх хурал Төв аймгийн Эрүүгийн хэргийн анхан шатны шүүхэд үргэлжилж байна. Өнөөдөр өглөө 09.00 цагт зарлагдаад байсан ТЕГ-ын дарга асан Б.Хурц нарт холбогдох шүүх хурал 10.00 цаг эхэллээ. Тэднийг С.Зоригийн хэргийг шалгах явцдаа гүйцэтгэх ажлын хууль тогтоомж зөрчиж, хэргийн холбогдогч нарыг хууль бусаар эрүүдэн шүүсэн хэрэгт яллагдагчаар татаж, шүүн таслах ажиллагааг явуулж байна. Өнөөдөр эхэлсэн шүүх хуралдаанд УИХ-ын түр хорооны таван гишүүн (Ц.Нямдорж тэргүүтэй) хаалттай хуралдаанд ажиглагчаар оролцох хүсэлт тавьсан авч шүүх тэдний хүсэлтийг хүлээж аваагүй байна.
Шүүх хуралдаан эхэлсний дараа шүүхийн байрны гадна талбайд иргэд эсэргүүцлийн жагсаал хийж эхэлжээ. Тэдний нэг хэсэг нь Хууль зүй, дотоод хэргийн сайд Ц.Нямдоржийг шүүхэд нөлөөлөхийг оролдож байна гэж үзэж байгаа бол нэг хэсэг нь Б.Хурц нарыг буруутгаж байна.
Тухайлбал, “Дархан Монгол ногоон нэгдэл”-ийн удирдах зөвлөлийн дарга Б.Дашэнэ талаар “Бид өнөөдөр зөвхөн энэ жагсаалыг хийж байгаа юм биш. Өнгөрсөн өвлөөс эхлэн залуу таван УИХ-ын гишүүдтэйгээ нийлээд, жагсаал зохион байгуулж тэмцэж байсан. Өнөөдрийн шүүх хуралд Б.Хурц тэргүүтэй хүмүүс ирж, оролцож байгаа нь маш том явдал юм. Хэрэв бид жагсаал хийж, ийм том өөрчлөлтийг хийж чадаагүй бол энэ хүмүүс ямар ч шийтгэл хүлээхгүй өнгөрөх байсан. Тэгэхээр эдгээр хүмүүс Монголын шударга шүүхийн өмнө шийтгүүлэхээр ирсэн байгаа нь маш том дэвшил” гэв.
Харин эдгээр жагсагчдын эсрэг байр суурь илэрхийлсэн самбар барьсан иргэдийн төлөөлөл болох Д.Ганбат нь Б.Хурцын ангийнх нь хүүхэдюм байна. Тэр “Бидний хувьд шүүх хурлыг нээлттэй, шударга явуулахыг шаардаж байна. Шүүх хуралд УИХ-ын зарим гишүүд битгий оролцож, нөлөөлөх гэж оролдож байна. Мөн хэрэгтэн гэх Б.Амгаланбаатар нь яагаад энэ шүүх хуралдаанд гэрчээр оролцож байгаад эргэлзэж байна. Хэргийг үйлдэгч нь шүүх хуралд гэрчээр оролцож байгаа нь шүүх хуралдаан ямар нэг хуйвалдаангүй явна гэдэгт нь эргэлзэхэд хүргэж байна” гэжээ.
