x

Б.Хурцын шүүх хуралд Ц.Нямдорж, Ж.Батзандан нарын гишүүд оролцохыг хүсчээ

Улс төр, нийгмийн зүтгэлтэн С.Зориг агсны амь насыг хөнөөсөн хэргээр ял авсан Т.Чимгээ Б.Содномдаржаа нарыг эрүүдэн шүүсэн, гүйцэтгэсэн ажлын журам зөрчсөн хэргээр Б.Хурц нарын 9 хүнд эрүүгийн хэрэг үүсгэсэн билээ. Уг хэргийг Төв аймаг дахь сум дундын Эрүүгийн анхан шатны шүүхэд шүүхээр болсон.

Ирэх даваа гаригт буюу энэ сарын 12-ны өдөр ТЕГ-ын дарга асан Хошууч генерал Б.Хурц, Улсын ерөнхий прокурорын орлогч асан Г.Эрдэнэбат нарын есөн хүний шүүх хурал болно. Тэгвэл шүүх хуралд Хууль зүй, Дотоод хэргийн сайд болон бусад гишүүд оролцох хүсэлтэй байгаагаа илэрхийлжээ.

Тодруулбал, Олон улсын парламентын холбооны Удирдах зөвлөлөөс ирүүлсэн шийдвэрийг судалж, холбогдох санал дүгнэлт боловсруулах үүрэг бүхий түр хороог УИХ-аас байгуулсан. Тус хороог УИХ-ын гишүүн Ж.Батзандан ахалдаг бөгөөд гишүүдээр нь УИХ-ын гишүүн Л.Болд, Х.Нямбаатар, А.Сүхбат, Я.Санжмятав, Ө.Энхтүвшин нар ажилдаг юм. Тэд ирэх даваа гаригт болох Б.Хурц нарын шүүх хуралд оролцох хүсэлтээ Төв аймгийн шүүхэд гаргасан байна. Хорооны гишүүдийн зүгээс шүүх хуралд хөндлөнгийн ажиглагчаар оролцох хүсэлтэй байгаа аж.

Энэ талаар Төв аймгийн шүүхээс тодруулахад, "Шүүх хуралдаанд хөндлөнгийн ажиглагчаар орох хүсэлтийг шүүх хурал болохоос өмнө шийдвэрлэдэг" гэсэн тайлбарыг өглөө. Тиймээс өнөөдөр ажлын цаг дуусахаас өмнө шүүх хуралдаанд Ц.Нямдорж тэргүүтэй түр хорооныхон оролцох эсэхийг шийдвэрлэх юм байна.

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

Top