Баялаг түүхтэй, дэлхийд нэр хүндтэй энэ байгууллага Монголын улаан загалмай нийгэмлэгтэй нягт хамтран ажиллаж байдагт Шадар сайд талархал илэрхийлэв. УИХ 2016 онд Монголын улаан загалмай нийгэмлэгийн эрх зүйн байдлын тухай хуулийг шинэчлэн батлахдаа хүмүүнлэгийн чиглэлээр төрд туслах үүргийг нь тусгасныг дурдаад Төр-Улаан загалмайн хамтын ажиллагааны зөвлөл 21 аймаг, есөн дүүрэгт ажиллаж байгааг тэмдэглэсэн юм. Мөн МУЗН гамшгаас урьдчилан сэргийлэх, хүмүүнлэгийн тусламж үзүүлэх, гамшгийн хариу арга хэмжээ авах, бэлэн байдлыг хангах зэргээр идэвхтэй ажиллаж байгааг онцлов.

Тэрбээр Засгийн газар уур амьсгалын өөрчлөлтөд дасан зохицох, гамшгийн эрсдэлийг бууруулах, урьдчилан сэргийлэх, эрүүл мэнд, боловсролын үйлчилгээний хүртээмж, чанарыг сайжруулж, тогтвортой хөгжлийг хангахад анхаарч байгааг хэлээд МУЗН-тэй бүх талаар нягт хамтран ажиллахаа илэрхийлэв.

Улс орондоо төдийгүй олон улсын түвшинд нэр хүндтэй МУЗН-ийг Шадар сайд дэмжиж, хамтран ажиллаж байгаад  Олон улсын улаан загалмай, улаан хавирган сар нийгэмлэгүүдийн холбооны Ерөнхийлөгч Францеско Рока талархал илэрхийлэв. Мөн МУЗН-ийн эрх зүйн байдлын тухай хууль нь бусад улс оронд загвар хууль болсныг тэмдэглэсэн юм.