УИХ-ын Төрийн байгуулалтын байнгын хорооны өнөөдрийн хуралдаанаар Үндсэн хуульд нэмэлт өөрчлөлт оруулах тухай хуулийн төслийг хэлэлцэх эсэх асуудлыг хэлэлцээд 86,7 хувийн саналаар хэлэлцэх зүйтэй гэж үзэв. 

Санал хураалтыг хуульд заасны дагуу илээр явуулах, ингэхдээ гар өргөж санал хураалгах тухай Х.Тогтохсүрэн гишүүний горимыг саналыг Байнгын хорооны гишүүдийн олонхи дэмсэн тул хуулийг төслийг хэлэлцэх эсэх дээр гишүүд гар өргөж санал өгөв. Хуралдаанд оролцсон 15 гишүүний 13 нь дэмжиж, ирцэнд орсон боловч санал хураалтад оролцоогүй Д.Эрдэнэбат, О.Баасанхүү нарыг эсрэг санал өгсөнд тооцов.

Хэлэлцүүлгийн явцад Байнгын хорооны гишүүдийн зүгээс нэмэлт өөрчлөлтийн төсөлд ороогүй зүйл заалтаар зарчмын зөрүүтэй санал гаргасан ч байнгын хорооны дарга С.Бямбацогт "Үндсэн хуульд нэмэлт өөрчлөлт оруулах журмын тухай хуульд зааснаар Үндсэн хуульд оруулах өөрчлөлтийн зүйл заалт хязгаартай. Тиймээс нэмэлт өөрчлөлтийн төсөлд зааснаас бусад асуудлаар санал хураалгах боломжгүй" хэмээн хүлээж авсангүй.

Тухайлбал О.Содбилэг гишүүн УИХ-ын бүрэн эрхийн хугацааг таван жил болгох, Засгийн газрыг огцруулах эсэх асуудлыг ээлжит бус чуулган зарлаж хэлэлцдэг байх зэрэг санал гаргасан ч уг томьёоллоор санал хураалт явуулсангүй. 

Хэлэлцэж буй асуудалтай холбогдуулан, Үндсэн хуульд нэмэлт өөрчлөлт оруулах тухай хуулийн төслийн талаар гишүүд асуулт асууж, байр сууриа илэрхийллээ. 

УИХ дахь АН-ын зөвлөлийн дарга Д.Эрдэнэбат: 

-Үндсэн хуульд өөрчлөлт оруулах асуудлыг эхнээс нь хуулийн зөрчилтэй эхэлж болохгүй. Бүх нийтийн зөвшилцөл хэрэгтэй. Ерөнхийлөгчийн зөвшилцөлгүйгээр үнэмлэхүй олонхоороо Үндсэн хуулийн өөрчлөлтийг батлана гэж байхгүй шүү гэдэг сануулгыг та бүхэнд өгч байна. Мөн заавал хуулийн төслөөрөө өргөн баригдах ёстой. 

Байнгын хорооны гишүүн С.Бямбацогт: 

-Ерөнхийлөгчөөс Үндсэн хуулийн өөрчлөлтөд санал авахаар хоёр удаа бичгээр хандсан. Ерөнхийлөгчөөс 30 хоногийн дотор хариулт өгөөгүй учраас хуулийн дагуу Үндсэн хуульд оруулах нэмэлт, өөрчлөлтөд санал байхгүй юм байна гэж тооцсон. 

Үндсэн хуулийн өөрчлөлтөд Засгийн газар, Үндсэн хуулийн цэцээс тус тус санал ирсэн. Дэгийн хуулиар дээрх саналуудыг чуулганы хуралдаанд танилцуулдаг. Тэгэхээр маргаашийн чуулганы хуралдаанд уг саналуудыг танилцуулна.   

УИХ-ын гишүүн Ж.Батзандан: 

-Шударга иргэдийн нэгдсэн эвсэл гэдэг шинэ нам байгуулагдсан. МАНАН мафийн эсрэг ард түмний хөдөлгөөний шаардлага Үндсэн хуулийн өөрчлөлтөд яаж тусгагдсан бэ. Төрийг мафиас яаж салгах вэ. Баялгийн тэгш хуваарилалтыг яаж хийх вэ. Үүнийг хэлж өгөөч. 

Ажлын хэсгийн дарга Д.Лүндээжанцан: 

-Нэмэлт өөрчлөлтийн төсөл хариуцлага, хяналт тэнцэл, тогтвортой байдал гэдэг чиг баримжаагаар хийгдсэн. Нэмэлт өөрчлөлтөөр бүх шатанд хариуцлагыг сайжруулахыг зорьж байгаа. 

УИХ-ын гишүүн Л.Оюун-Эрдэнэ: 

-Энэ парламентын цорын ганц түүхэн үүрэг энэ Үндсэн хуулийн өөрчлөлт байж болох юм. 
Ерөнхийлөгч зургаан жилийн хугацаатай сонгогдоно. Энэ цикл явсаар байгаад парламентын сонгуультай давхцах юм бишүү. Үүнийг яаж харж байгаа вэ. 

УИХ-ын гишүүн Д.Тогтохсүрэн: 

-Нэг нь тэгш тоон дээр тэгш тоо нэмээд, нөгөө нь сондгой тоон дээр тэгш тоо нэмээд яваад байхаар хоорондоо давхцахгүй гэв.

Маргааш буюу Баасан гарагийн чуулганы нэгдсэн хуралдаанаар Үндсэн хуульд оруулах нэмэлт, өөрчлөлтийн төслийг хэлэлцэнэ.