Мэргэжлийн сүмо бөхийн их аварга Асашёорюү Д.Дагвадоржид Украин улс спортын олон улсын “Алтан Мангуст” шагналыг гардуулахаар болжээ.  

“Алтан Мангуст” одонг цэвэр алтаар хийдэг бөгөөд 11 дэх жилдээ зохион байгуулагдаж буй уг арга хэмжээний шагнал гардуулах ёслолыг арга хэмжээ есдүгээр сарын 7-нд Одесса хотод болох аж. 

Энэ талаар “Одесса медиа” агентлагийн сурвалжлагч их аваргатай холбогдож, тодруулга авчээ. 

Асашёорюү Д.Дагвадорж: "Би зорилго, мөрөөдлөө хамгийн түрүүнд тавьж, биелүүлэхийн төлөө зүтгэдэг байсан. Мянга гаруй жилийн түүхтэй сүмо бөхийн ёкозүна болж чадсандаа баяртай байдаг. Хувийн туршлагаасаа харахад залуу тамирчдад дэмжлэг маш чухал байдаг тул би залуу бөхчүүдийг дэмжихээр шийдсэн. Тэдэнд мэдлэг, ур чадвар заахаас гадна шинэ боломж олгохыг хичээдэг болсон. Тамирчдад зөвлөхөд өөртөө зорилго тавь. Тэгээд зорилгоо биелүүлэхийн тулд чадах бүх зүйлээ хий гэж зөвлөмөөр байна.

Украинд спортыг түгээн дэлгэрүүлэхийн тулд ажиллаж байгаа “Мангуст” байгууллагад талархсанаа илэрхийлье. Энэ шагналыг авсандаа их баяртай байна. “Мангуст” байгууллагын ерөнхийлөгч Магомед Магдиевт Украин улсад очих боломж олгосонд баярлалаа. Украин улсад энх тайван, аз жаргал, ялалт хүсэн ерөөе" гэжээ. 

Энэхүү шагналыг “Мангуст” олон нийтийн байгууллагын тэргүүн, Украины грэпплингийн холбооны ерөнхийлөгч, Украины гавьяат дасгалжуулагч Магомед Магдиев анх санаачилж байжээ.