УИХ-ын чуулганы өнөөдрийн нэгдсэн хуралдаанаар Ерөнхий боловсролын сургуулийн хоол үйлдвэрлэл, үйлчилгээний тухай хуулийн төсөл болон хамт өргөн мэдүүлсэн “Хууль хэрэгжүүлэх зарим арга хэмжээний тухай” Улсын Их Хурлын тогтоолын төслийг 77.1 хувийн саналаар дэмжин баталлаа.
Энэхүү тогтоолын төсөл 2020 оны есдүгээр сарын 1-нээс эхлэн 1-5 дугаар ангийн сурагчид үдийн цай бус үдийн хоол иддэг болох боломж бүрдлээ. Цаашлаад 2024 он гэхэд Ерөнхий боловсролын 1-12 ангийн бүх сурагч халуун хоолтой болох юм.
Энэ ажлыг хэрэгжүүлэхэд нийт 300 гаруй тэрбум төгрөгийн төсөв шаардлагатай бөгөөд жилд дунджаар 65 орчим тэрбум төгрөг төсөвт суулгахаар төлөвлөжээ.
Энэ талаар УИХ-ын гишүүн М.Оюунчимэг мэдээлэл хийлээ.
Тэрээр "Энэ өдөр түүхэнд бичигдэх өдөр болохоор байна. Монгол улсад анх удаа Ерөнхий боловсролын сургуулийн хоол үйлдвэрлэл, үйлчилгээний тухай хуультай боллоо. Дэлхийн 80 гаруй улсад хэрэгждэг олон улсын стандартад нийцсэн халуун хоол үйлчилгээгээр үр хүүхдээ хангадаг уг төсөлд монгол улс өнөөдөр нэгдлээ. Энхий ээлжинд 1-5-р ангийн 347 мянга орчим хүүхэд маань халуун үдийн хоолоор үйлчлүүлхээр боллоо. Энэ хуулийн хамгийн гол онцлог нь хүүхдийн нас онцлогт тохирсон шим тэжээлтэй, эрүүл аюулгүй хүнсээр мэргэжлийн хүмүүсийн бэлтгэсэн хоол, хүнсээр хангах эрх зүйн орчин бүрдэж байна" гэлээ.
