АНУ-ын Айдоха мужийн “Idaho Falls” амьтны хүрээлэнгийн Засу хэмээх ингэ төллөжээ. Энэ сарын 18-нд төрсөн ботгонд нэр хайж буй гэдгээ тус хүрээлэн фэйсбүүк болон инстаграм хуудсандаа бичсэн байна.
Саяхан мэндэлсэн эр ботго Засу, Говь хоёрын гурав дахь төл гэнэ. Тус амьтны хүрээлэн шинэ гишүүддээ уугуул нутгийнх нь хэлээр нэр өгдөг уламжлалтай аж. Тиймдээ ч Монголын хоёр бөхт тэмээний үр төлд монгол нэр өгөхөөр амьтанд хайртай хүмүүст ханджээ.
“Idaho Falls” амьтны хүрээлэнгийн Боловсролын мэргэжилтэн Санни Катсенис “Амьтны хүрээлэнд маань шинэ төл мэндлэх бүрт бид маш ихээр баярлан хүлээн авдаг. Шинэ төлүүдэд төрөлх эх нутгийнх нь нэрийг өгөхийг чухалчилдаг. Тиймээс бид олон нийтийг манай ботгонд маш хөөрхөн монгол нэр санал болгохыг хүсч байна” гэжээ.
“Idaho Falls” амьтны хүрээлэнгийн шинэхэн ботгонд нэр хайж буй тухай постны дор Батбаяр, Бөхт, Эрдэнэ гэх мэт монгол нэрс санал болгосон байлаа. Энэ долоо хоногт хүмүүсийн бичсэн сэтгэгдэл дээрх нэрнүүдээс амьтны хүрээлэнгийнхэн тохирох нэрийг сонгох бөгөөд та ч гэсэн өөрийн хүссэн нэрийг санал болгох боломжтой аж. Тус амьтны хүрээлэн дэлхийн зургаан тивийн 120 төрөл зүйлийн 330 гаруй амьтантай бөгөөд тэдний гурав нь Бактриан хэмээн нэрлэгддэг хоёр бөхт монгол тэмээ юм.
