УИХ-ын гишүүн асан Д.Гантулгын бүрэн эрхийг сэргээхийг эсэргүүцэн Ардчилсан эмэгтэйчүүдийн холбоо болон МАХН-ын гишүүд “Бандааштай жагсаал”-ыг Үндсэн хуулийн цэцийн өмнөх талбайд өнөөдөр зохион байгуулав.

"Нэр бүхий иргэд Үндсэн хуулийн цэцэд хандаж, УИХ-ын 2018 оны зургадугаар сарын 14-ний өдрийн “УИХ-ын гишүүнээс чөлөөлөх тухай” 49 дүгээр тогтоол Сонгуулийн тухай болон Үндсэн хуулийг зөрчсөн байна гэсэн мэдээлэл ирүүлэн, УИХ-ын гишүүн Д.Гантулыг чөлөөлсөн тогтоол нь 2019 оны хоёрдугаар сарын 2-ны өдрийн “УИХ-ын сонгуулийн 42 дугаар тойрогт нөхөн сонгууль товлон зарлах, санал авах өдрийг тогтоох тухай” 22 дугаар тогтоол, Сонгуулийн тухай хуулийн 12 дугаар зүйлийн 12.1, 12.3 дахь хэсэг болон Үндсэн хуулийн зарим заалтад нийцээгүй гэсэн юм".

Үндсэн хуулийн цэц уг мэдээллийн дагуу маргаан үүсгэж, УИХ-ын тогтоол Үндсэн хууль болон бусад хууль зөрчсөн эсэхийг өнөөдөр дунд суудлын хуралдаан зарлаж, хуралдаанаар хэлэлцэж байна. 

Гэвч иргэдийн зүгээс Үндсэн хуулийн цэц шударга ажиллаж, Д.Гантулгын бүрэн эрхийг сэргээх эсэх маргааныг шийдвэрлэхгүй байхыг шаардаж “Иргэд сонгох эрхээ эдэлж чадахгүй байна. УИХ-ын гишүүн Д.Гантулгыг дахин гишүүн болгож болохгүй. Сүүлийн үед хүүхэд эмэгтэйчүүдийг хүчирхийлсэн хэрэг их гарч байгаа нь нийгмийг эмзэглүүлж байгаа. Үндсэн хуулийн цэц шударга ажиллах хэрэгтэй. Д.Гантулгын хэрэг дээр маргаан үүсгэх шаардлагагүй” гэв.