МАХН бага чуулганаар УИХ-ын сонгуулийн 42 дугаар тойрог буюу Хэнтий аймгийн Хэрлэн, Мөрөн, Жаргалтхаан суманд ирэх сарын 30-нд болох УИХ-ын гишүүний нөхөн сонгуульд тус намын дарга Н.Энхбаярыг нэр дэвшүүлэхээр боллоо.

Нэр дэвшигч Н.Энхбаяр: "Хуулиараа бид тавдугаар сарын 24-28-ны хугацаанд 42 дугаар тойргийн нөхөн сонгуульд нэр дэвшүүлэх ажлыг зохион байгуулах ёстой. Тиймээс энэ хугацаандаа багтаж энэ ажлын зохион байгуулсан. Надад итгэл хүлээлгэж, нэр дэвшүүлэх шийдвэр гаргасан Бага чуулганы гишүүддээ баярлалаа. 42 дугаар нөхөн сонгуультай холбогдуулж янз бүрийн байр суурь байгаа. Эрх баригчид сонгууль битгий болоосой гэж бодож байгаа. Итгэлийг нь даагаагүй шүү дээ гэж бодож байгаа. Одоо ч гэсэн энэ оролдлогоо орхилгүй ҮХЦ-д өөрсдийн томилсон хүмүүсээр энэ сонгуулийг хийлгэхгүй байх ажлыг зохион байгуулж байгаа. 

Гэхдээ бид цэцийн шийдвэрийг хүлээлгүйгээр, нэр дэвшүүлэх ажлыг зохион байгуулж байгаа нь зөв гэж харж байгаа. Энэ парламентын хугацаа дуусахад хэтэрхий бага хугацаа үлдсэн гэж иргэд үзэж байгаа. Гэхдээ иргэд өөрсдийн дуу хоолойгоо хүргэх эрхээ эдлэх ёстой гэж үзсэн. 

МАН, АН-ынхан аль хэдийнэ ажиллаад эхэлсэн. Тэрбум тэрбумаар мөнгө тарааж байгаа. Хэнтийн иргэд маань хулгайн мөнгийг авсан ч гэсэн шударгаар саналаа өгч чадна гэдэгт итгэж байна. 

МАН, АН хоёр луйвраар л ялна. Амаргүй сонгууль болно. Луйварчидтай өрсөлдөхөд ямар хэцүүг бид 2017 оны сонгуулиар мэдсэн. Бусад намуудад хандаж хэлэхэд энэ сонгуульд шударгаар, МАН, АН-ын гар хөл болохгүйгээр өрсөлдье гэж уриалмаар байна.  

Хэнтийчүүддээ хандаж МАХН та нарын итгэлийн даана, МАХН-аас нэр дэвшиж байгаа Н.Энхбаяр миний бие та нарынхаа итгэлийн даасан шиг даана. Та нарынхаа нүүр царайг төсөөлж, та нарыгаа бодож, өрөвдөж их өрийг тэглэж, мянганы замыг эхлүүлж байсан. Монгол Улс мандтугай, Хэнтийн сонгогчид мандтугай" гэлээ.

Нэр дэвшигчийг тодруулсан тухай МАХН-ын шийдвэрийг ойрын хугацаанд Сонгуулийн ерөнхий хороонд хүргүүлэх юм байна.