ЗГХЭГ-ын дарга Л.Оюун-Эрдэнэ "Оюутолгойн гэрээний үеэр авлига авсан байж болзошгүй эрх бүхий 4-5 хүн байгаа" гэв. АТГ энэ хэргийг шалгаж байгаа тул нэрийг нь хэлэх боломжгүй гээд “Зарим компанид давуу эрх өгсөн байж болзошгүй зүйл байгаа. Жишээ нь, “Модерн Номадс” компани “Оюу толгой”-н катеринг нийлүүлэхэд, зарим шатахуун түгээхтэй холбоотой “Оюу толгой”, “Рио Тинто” давуу эрх олгох хэлцэл үүссэн байж болзошгүй гэж үзэж байгаа” гэлээ. Энэ талаарх дэлгэрэнгүй мэдээллийг Оюутолгойн гэрээний хэрэгжилтийг шалгахаар УИХ-аас томилогдсон ажлын хэсгийн дүгнэлтийг УИХ-аар хэлэлцэж нэгтгэгдээд, АТГ, Аудитын дүгнэлттэй танилцсаны дараа Засгийн газар энэ асуудлаар эцсийн байр сууриа илэрхийлэх боломжтой гэв.

Сүүлийн өдрүүдэд У.Хүрэлсүхийн Засгийн газрын нэг сайд гадаадын байгууллагаас (компаниас ч байж магадгүй) 10 сая ам.долларын авилга авсан тухай дуулиан дэгдэж, Ерөнхий сайдыг Хэнтийгээс ирсний дараа албан ёсны мэдээллийг авна хэмээн хэвлэлүүд хүлээж байна. Харин ХЭГ-ын даргын хувьд энэ дуулианаас Засгийн газрыг холдуулахын тулд цаг хожих зорилгоор зориуд ийм мэдээлэл хийсэн байж ч болох талтай.

Тэр энэ 10 сая ам долларын авлигын тухай “Хууль хяналтын байгууллагуудаас тодруулахад одоогоор тийм асуудал албан ёсоор ирээгүй, шалгагдаж байгаа зүйл байхгүй гэсэн. Гэвч иргэд хардах эрхтэй тул цаашид энэ талаар хянаж шалгах байх” гэсэн бөөрөнхий хариулт өглөө.