Монголбанк өчигдөр мэдэгдэл хийн, Капитал банкийн албадан татан буулгаж, эрх хүлээн авагчийг томилсноо зарласан. Харин өнөөдөр Сангийн сайд Ч.Хүрэлбаатар өнөөдөр дээрх үйл явдалтай холбогдуулан дараах мэдээллийг хийлээ.

Сангийн сайд Ч.Хүрэлбаатарын мэдээлснээр Капитал банкинд төрийн данстай 340 орчим тэрбум төгрөг (Тэтгэврийн даатгалын сангийн 104 тэрбум, Эрүүл мэндийн даатгалын сангийн 136 тэрбум төгрөг, Хөгжлийн банкны 52 тэрбум төгрөг гэх мэтчилэн) байршиж байжээ. Хөгжлийн банкны 52 тэрбум төгрөгийг Н.Мөнхбат тус банкны захирлаар ажиллаж байх үед байршуулсан байсан гэдгийг тэрээр онцоллоо.

Түүнээс гадна Жижиг, дунд үйлдвэрлэлийг хөгжүүлэх сангийн 47 тэрбум, Анагаахын шинжлэх ухааны их сургуулийн дөрвөн тэрбум, МУБИС-ийн хоёр тэрбум төгрөг тус тус байршиж байсан аж. Нийт дүнгээрээ  340 орчим тэрбум төгрөг.

Капитал банк 2015 оноос төлбөр хийх чадваргүй болсноос эдгээр санхүүжилтийг гаргаж өгөх боломжгүй байсан гэж Сангийн сайд тайлбарлалаа. Мөн хурдан шуурхай арга хэмжээ авахгүй бол хохирол өсөх байсан гэлээ.

Онцолоход, тус банкны зээлдэгчид зээлээ эргүүлэн төлнө. Тиймээс төсвийн ерөнхийлөн захирагч нарт албан бичиг илгээн, Банкны тухай хуулийн 71.1-т зааснаар 60 хоногийн дотор эрх хүлээн авагчид дээрх хохирлуудыг  барагдуулах хүсэлт буюу нэхэмжлэлээ гаргах үүрэг өгнө” гэв.

С.Чинзориг: Капитал банкинд Нийгмийн даатгалын сангийн 101 тэрбум төгрөг байсан

ХНХ-ын сайд С.Чинзориг:

-Монголбанктай ярилцаад эхний ээлжинд иргэдийн хадгаламж, сангуудын хохирлыг барагдуулахаар ажиллаж байгаа гэсэн ойлголт авсан. Нийгмийн даатгалын сангийн үлдэгдлийг ямар хугацаанд  барагдуулах талаар ярилцаж байна. Тус банкинд хөдөлмөр эрхлэлтийг дэмжих сангийн долоон тэрбум төгрөгийг 2015 онд байршуулсан. Үүнээс одоогоор 1.2 тэрбум төгрөгийн үлдэгдэл байсан.

Намайг сайдаар томилогдож ирэхэд Нийгмийн даатгалын сангийн чөлөөт үлдэгдэл 280 орчим тэрбум төгрөгийг "Капитал" банкинд байршуулсан байсан юм. Түүнээс хойш хөрөнгөө буцааж татах арга хэмжээ авч одоогоор 101 тэрбум төгрөгийн үлдэгдэлтэй байна. Энэ 101 орчим тэрбум төгрөгийг ойрын хугацаанд буцаан авах графикийг Монголбанктай хамтран гаргана. Үүний дагуу буцаан төлөлт  хийгдэнэ. Энэ хүрээнд Нийгмийн даатгалын сан болоод төрийн сан ямар нэг эрсдэлд орохгүй.

-Буцаан авна гэхээр "Капитал" банкны эзэмшигчдээс авна гэсэн үг үү, эсвэл?

-Монголбанк тухайн банкны эрх хүлээн авагч учраас төлнө. "Капитал" банкны зарим хөрөнгийг борлуулах, худалдах гэх мэт аргаар эрх хүлээн авагч нь  хохирлыг барагдуулна. Тиймээс Монголбанк ямар эх үүсвэрээс мөнгө босгох нь тодорхойгүй байна.

-Төрийн сангийн мөнгөнүүдийг өөр ямар банкуудад байршуулж байгаа вэ?

-Намайг сайдаар томилогдоход жижиг арилжааны банкуудад байршиж байсан. Түүнээс хойш өөрчилж, ХААН, Төрийн банкинд нийгмийн даатгалын хөрөнгийг байршуулахаар ажилласан. Бусад сангийн үлдэгдэл дээр эрсдэл хүлээхгүй.

Сайд нар ингэж ярив. Сануулахад, өнгөрөгч оны арваннэгдүгээр сард ЖДҮХС-гийн зээлийн асуудал дуулиан шуугиантайгаар зарлагдахад тус банк 2015 оноос эхлэн жил бүр ЖДҮХС-гээс зээл авч ирсэн нь илэрсэн. Гэтэл энэ үед банк аль хэдийн төлбөрийн чадваргүй болчихсон байж. Тэгэхээр төлбөрийн чадваргүй банкинд зээл өгсөн асуудал ч гэсэн тухайн үеийн Засгийн газар, сайд нартай холбоотойгоор дахин сөхөгдөх нь.