УИХ-ын 23-р тогтоолын дагуу Монгол Улсын Засгийн газраас “Эрдэнэт үйлдвэр”-ийг Төрийн өмчит үйлдвэрийн газар болгон өөрчилж, бүтэц зохион байгуулалтын өөрчлөлт хийж эхлээд байгаа. Ерөнхий захирлаар өмнө ажиллаж байсан Х.Бадамсүрэнг үргэлжлүүлэн томилсон бөгөөд өнгөрөгч баасан гаригт орон гараад байсан дөрвөн орлогчийг шинээр томилсон байна. 

Өнгөрөгч сард Засгийн газрын шийдвэрээр “Эрдэнэт” үйлдвэрт онц дэглэм тогтоох үеэр тус үйлдвэрийн Тэргүүн дэд захирал, Эдийн засгийн асуудал хариуцсан орлогч, Хөгжлийн бодлогийн газрын дарга, Хуулийн хэлтсийн дарга, Хуулийн хэлтсийн даргын орлогч, Ерөнхий нягтлан буюу санхүүгийн хэлтсийн дарга, Хүний нөөцийн албаны дарга гэсэн албан тушаалтнуудыг чөлөөлөөд байсан юм. Тэд "49 хувийн талаас томилогдсон" гэдэг нь чөлөөлөх үндэслэл болсон бөгөөд өнгөрөгч баасан гаригт дөрвөн орлогчийг шинээр томилсон байна.   

1.Үйлдвэрлэл эрхэлсэн дэд захирал бөгөөд Ерөнхий инженер Т.Батмөнх,

2.Эдийн засаг хариуцсан орлогч Д.Үүрийнтуяа

3.Нийгмийн асуудал хариуцсан орлогч Д.Дэлгэрбаяр

4. Хөгжлийн асуудал хариусан орлогч П.Энхбат

Харин хэвлэлүүдэд гарсан мэдээгээр Хөгжлийн асуудал хариуцсан орлогч П.Энхбатыг 2016 оны УИХ-ын сонгуульд Х.Нямбаатар гишүүний сонгуулийн менежерээр ажилласан хэмээн бичиж байна. Сонгуулийн дараа тэрээр “Эрдэнэт” үйлдвэрийн 100 хувь эзэмшилт, охин компани болох “РСЦ” ХХК-ийн гүйцэтгэх захирлаар очжээ. Түүнийг үйлдвэрийн 49 хувийг эзэмшигч болсон "Монголын зэс"-ийн шийдвэрээр ажлаас нь чөлөөлсөн боловч ажлаас үндэслэлгүй халагдсан хэмээн шүүхдэж, ажилдаа эргэн орсон байна.