“Монгол цэргийн нэгдсэн холбоо” төрийн бус байгууллага өнөөдөр Төрийн ордонд анхдугаар хурлаа хийлээ. Уг ТББ-ын зорилго нь эх оронч үндэсний үзэл, бахархлыг хөгжүүлэх, ард түмнээ соён гэгээрүүлэх, Монгол улсын тусгаар тогтнол, аюулгүй байдлын дархлаа, үнэт зүйлсийг хамгаалах үйлсэд төрийн болон иргэний нийгмийн байгууллагуудтай хамтран ажиллах явдал. Тус байгууллага одоогоор 1000 гаруй гишүүнтэй юм байна.

Монголын цэрэг, хүчний байгууллагын нийт 27 төрийн бус байгууллага байдаг бөгөөд "Монгол цэргийн нэгдсэн холбоо" ТББ нь эдгээр холбоодыг нэгтгэж нийгэмд дуу хоолойгоо хүргэх, үндэсний аюулгүй байдлын эрх ашигт нийцүүлэн хэрэгжүүлсэн аливаа үйл ажиллагааг дэмжих, байр суурийг бэхжүүлэхийн төлөө нийгэмд үйлчилдэг төрийн болон төрийн бус байгууллагуудтай хамтран ажиллах юм байна. 

Тус холбоог цэргийн жинхэнэ албан хаагчид, үндэсний аюулгүй байдлыг хангах тусгайлсан чиг үүрэгтэй байгууллагуудын ажилтан, албан хаагчид, түрүүч, байлдагчид болон иргэдийн сайн дурын үүсгэл санаачлагаар байгуулжээ. Холбоо нь их хурал, бага хурал, удирдах зөвлөл тэргүүнээс бүрдэх бөгөөд төв салбар Улаанбаатарт байх, орон нутагт салбар нэгжтэй байж болохоор дүрэмд тусгажээ. Холбооны ээлжит их хурлыг зургаан жилд нэг удаа, ээлжит бус чуулганыг холбооны тэргүүний шийдвэрээр хуралдуулах юм байна. 

Өнөөдөр анхдугаар хурлаараа холбооны дүрэм, бүтцийг баталж, Бага хурлын гишүүд болон тэргүүнээ сонгожээ. Анхдугаар хуралдааны 950 төлөөлөгч Монгол Улсын Ерөнхий сайд У.Хүрэлсүхийг холбооны тэргүүнд 100 хувийн саналаар сонгожээ.