Монгол Улсын Ерөнхийлөгчөөс УИХ-ын даргад өргөн мэдүүлсэн Шүүгчийн эрх зүйн байдлын тухай, Прокурорын тухай, Авлигын эсрэг хуульд тус тус нэмэлт өөрчлөлт оруулах тухай хуулийн төслүүд нь Үндсэн хууль зөрчсөн гэж үзэж байгаагаа Ардчилсан нам илэрхийлж, энэ сарын 27-нд мэдээлэл хийсэн билээ.

Хэвлэлийн хуралд АН-ын дарга С.Эрдэнэ, УИХ-ын гишүүн Б.Пүрэвдорж, АН-ын ЕНБД Ц.Туваан, УИХ-ын гишүүн асан Х.Тэмүүжин, "Ардчилсан залуучуудын холбоо"-ны ерөнхийлөгч С.Эрдэнэболд нар оролцож, байр сууриа илэрхийлснийхээ дараа дөрөвдүгээр сарын 4-нд намынхаа онц их хурлыг хуралдуулахаар болсноо зарлаж эрх баригчдын хууль зөрчсөн үйлдлийн эсрэг тэмцэхээ илэрхийлж байв. 

Харин өчигдөр Ардчилсан намын онц их хурал цуцлагдсан тухайгаа мэдэгдэв. Тус намын цахим хуудаст дөрөвдүгээр сарын 5-нд Сүхбаатарын талбайд Онц их хуралдай буюу эсэргүүцлийн цуглаан зохион байгуулах зар тавигдсан байна. АН Онц их хуралдайг улс орон даяар зохион явуулахаар болжээ.