Жирэмслэлтээс хамгаалах эм нь бараг 60 жилийн өмнө зохион бүтээгдсэн ч энэ хугацаанд зөвхөн эмэгтэйчүүдэд зориулагдсаар ирсэн билээ. Тэгвэл Вашингтоны их сургуулийн судлаачид эрчүүдэд зориулсан жирэмслэлтээс хамгаалах эм бүтээжээ. 

Эрчүүдэд зориулсан жирэмслэлтээс хамгаалах эмийн туршилтыг амжилттай хийсэн тухай BBC агентлаг мэдээлжээ. Туршилтанд 40 эрэгтэйг сонгож 28 хоногийн турш уг эмийг уулгаж, үр дүнг нь хянаж үзсэн байна. 

"Үр дүнгээс үзэхэд энэ эм нь бэлгийн дур хүслийг бууруулахгүйгээр эр бэлгийн эсийн дааврын боловсруулалтыг бууруулж байсан" гэж нөхөн үржихүйн биологич Кристина Ван ярьжээ.

Туршилтын эмийг уусан эрэгтэйчүүдийн биед ямар нэгэн ноцтой сөрөг, гаж нөлөө ажиглагдаагүй бөгөөд эр бэлгийн эсийн ялгаралтад гол нөлөө үзүүлдэг хоёр гормоны түвшин эрс буурсан үзүүлэлттэй гарчээ. Харин цөөн хэдэн эрчүүдэд ядрах, толгой өвдөх, батга гарах тэдний жин нэмэгдэх гэх мэт жижиг өөрчлөлтүүд гарсан байна. 

Хэдийгээр туршилт амжилттай болсон ч эрдэмтэд эмийн үйлчлэлээс илүү аюулгүй байдалд анхаарал тавьж байгаагаа онцолсон бөгөөд энэ удаагийн туршилт харьцангуй богино хугацаанд үргэлжилсэн, тус эмийг ашиглалтанд оруулахын тулд илүү олон хүн дээр төвлөрсөн удаан хугацааны судалгаануудыг хийх төлөвлөгөөтэй байгаа гэдгээ онцолсон байна.

Мөн ойрын 10 жилд энэ төрлийн эм зах зээлд нэвтрэх боломжтой болно гэж таамаглаж байгаагаа хэлжээ.