Төр, нийгмийн зүтгэлтэн С.Зориг агсны хэрэгт яллагдсан Б.Содномдаржаа, Т.Чимгээ нарыг эрүүдэн шүүсэн бичлэгийг өчигдөр чуулганы заварлагаар үзсэн УИХ-ын гишүүд “нүд халтирам аймшигтай, байж боломгүй хэрэг” хэмээн дүгнэсэн. Харин энэ асуудлаар өнөөдөр Хүний Эрхийн Үндэсний Комиссоос мэдээлэл хийж, УИХ-ын гишүүдийн энэ байр суурьт эргэлзэж буйгаа илэрхийллээ.

Учир нь хүнийг тамлан зовоох арга техник, хохирогчдын асуудлыг жил бүр илтгэлүүддээ дэлгэрэнгүй тусгадаг байсныг тэд онцоллоо. Энэ асуудлаар ХЭҮК-оос 17 удаа (жил бүр) илтгэл бичсэн ч УИХ энэ асуудлыг авч хэлэлцээгүй юм байна.

Энэ тухай ХЭҮК-ын гишүүн П.Оюунчимэг "Эрүүдэн шүүсэн асуудал өнөөдөр л яригдаж байгаа мэт ойлголт олон нийтийн дунд төрж байна. Энэ тухай 2001 оноос хойш өнөөдрийг хүртэл, ХЭҮК байгуулагдсан цагаасаа эхлэн анхаарч, ажиллаж, холбогдох илтгэлүүддээ хүнийг тамлан зовоох арга техник, хохирогчийн асуудлыг тодорхой тусгаж өгч байсныг УИХ-ын гишүүд өмнө нь уншиж байсан бол өнөөдөр тэд эрүүдэн шүүлтийг гэнэт ярьж буй мэтээр гайхаж хүлээн авахгүй байсан болов уу. 

НҮБ-ийн Тусгай илтгэгч Монгол Улсад 2006 онд долоо хоногийн хугацаанд айлчилсан. Энэ үеэр цагдан хорих ангид хүнийг 24 цаг зодож амь насыг нь хөнөөсөн хэрэг гарч байсан. НҮБ-ын Тусгай илтгэгч манай улсад айлчилсныхаа дараа “Монгол Улсад эрүүдэн шүүлтийн нөхцөл байдал бодитойгоор оршин тогтнож байна” гэдгийг тайландаа тусгаж, энэ дагуу манай улсад зөвлөмж хүргүүлсэн" гэв.

Өнөөдрийг хүртэл ХЭҮК-оос нийт 17 илтгэл бичиж, УИХ-д танилцуулсны 13-т нь эрүүдэн шүүлтийн асуудлын талаар оруулсан байна. Харамсалтай нь, энэ талаар дорвитой арга хэмжээ аваагүйгээс гадна Мөрдөн байцаах албыг татан буулгаж, янз бүрийн үүргийн асуудал оногдуулах гэж оролдсон тухай комиссын дарга Ж.Бямбадорж хэллээ.

С.Зоригийн амийг хөнөөсөн хэргийг шалгахтай холбоотой 2015 оны долдугаар сараас эхлээд л “эргэлт оруулахгүй байна, тамлаж зовоож байна” гэх мэт гомдол ирж, тэр цагаас ХЭҮК нь Үндэсний аюулгүй байдлын зөвлөл, Улсын ерөнхий прокурор, Шүүхийн шийдвэр гүйцэтгэлийн ерөнхий газар, нийслэлийн Прокурорын газар, Тагнуулын ерөнхий газарт асуудлыг тавьж ирсэн юм байна. Гэвч Нийслэлийн Прокуророос өөр нэг газар хариу өгөөгүй гэнэ.

С.Зориг агсны амь насыг хөнөөсөн хэргээр шүүхээс ял сонссон Б.Содномдаржаа нь  ҮАБЗ-д 2016 онд гомдол гаргаж байжээ. Уг гомдолд дурдсан зүйл нь Б.Содномдаржаа, Т.Чимгээ нарыг эрүүдэн шүүсэн бичлэгийн талаар гишүүдийн ярьсан зүйлтэй агуулга нэг байж. ХЭҮК-т мөн гомдол гаргаж, ХЭҮК ч тухай бүрт нь холбогдох газруудад нь хүргүүлж, УИХ-д жил бүр танилцуулж, эрүүдэн шүүлтийн эсрэг арга хэмжээ авахыг анхааруулж ирсэн юм байна.