Хууль зүй, дотоод хэргийн сайд Ц.Нямдоржийн өнгөрөгч долоо хоногт (энэ сарын 21) С.Зориг агсны хэргийн талаар мэдээлэл хийж, "Хэргийн яллагдагч нарыг энэ хэрэгт холбоогүй, эрүү шүүлт хэрэглэж зохиомол хэрэг хүлээлгэсэн байна" гэсэн билээ. Өчигдөр уг асуудлаар УИХ дахь МАН-ын бүлэг Ц.Нямдорж сайдын мэдээллийг сонсоод эрүүдэн шүүсэн баримт болох бичлэгийг олон нийтэд үзүүлэх, ҮАБЗ-өөр хэлэлцүүлэх шийдвэр гаргаад байгаа. Уг асуудалтай холбогдуулан хуульч Н.Ариунболд өнөөдөр  мэдээлэл хийлээ. 

Н.Ариунболд: 

-"УИХ, Засгийн газрын гишүүд шүүхийн гаргасан шийдвэр рүү дайрсан мэдээлэл хийж байна. Энэ нь шүүхийн шийдвэрийг үл зөвшөөрсөн, Үндсэн хуульд нийцэхгүй, шүүн таслах үйл ажиллагаанд нөлөөлөхийг оролдсон оролдлого гэж үзэж байна. Хууль зүй, дотоод хэргийн сайд Ц.Нямдоржийн хэлсэн шиг эрүүдэн шүүсэн, 1937 оны хэлмэгдэл  давтагдсан нотлох баримт байгаа бол Засгийн газар, намын бүлэгт бус шүүх, прокурорт хандах шаардлагатай. Ардчилсан эрх зүйт оронд нэг ч иргэн хэлсээр шийтгэгдэх ёсгүй. Шүүх, прокурорт хандалгүйгээр Засгийн газар, намын бүлгийн хуралдаанд танилцуулж байгаа нь хуульд нийцэхгүй, шүүхийн бүрэн эрхэд халдсан үйлдэл гэж үзэж байна. Тиймээс Хууль зүй, дотоод хэргийн сайд Ц.Нямдоржийг нотлох баримт байгаа бол шүүх, прокурорт яаралтай хандахыг шаардаж байна” гэлээ.

Сануулахад Хууль зүйн сайд Ц.Нямдорж өнгөрөгч лхагва гаригт Засгийн газрын ээлжит хуралдааны дундуур мэдээлэл хийж, “С.Зоригийн амь настай холбоотой эрүүдэн шүүх ажиллагаа явуулсан нь тодорхой болж байгаа. Энэ асуудлаар ҮАБЗ-д мэдээлэл өгнө. Би сайдын ажлаа авсны дараа нэг хүнийг ажлаас халсан. Одоо тэр хүн шалгагдаж байгаа. Монголд цаашид үеийн үед 37 оны хэлмэгдүүлэлт хэзээ ч болохгүй гэж бодож байна. Би тэр хоёр яллагдагчтай очиж уулзсан. Хийгээгүй хэрэгт хэлсээр шийтгүүлж, хүйтэн камерт яаж амьдардгийг нь харах гэж би очсон. Өчигдөр Ч.Содномдаржаа, Т.Чимгээ хоёрыг эмнэлэгт хэвтүүлсэн. Энэ хоёр хүний ар гэрээс Монгол төрийн өмнөөс уучлал гуйж байна” гэсэн билээ.