Ерөнхий сайд У.Хүрэлсүх БНСУ-ын Ерөнхий сайд Ли Наг Ёныг Сүхбаатарын талбайд угтан авч мэндчилэн, БНСУ-ын Засгийн газрын тэргүүний Монгол Улсад хийх албан ёсны айлчлал эхэллээ.

Тэрбээр, Их эзэн Чингис хааны хөшөөнд хүндэтгэл илэрхийлж, “Хүндэт зочны дэвтэр”-т гарын үсэг зурлаа. Одоо хоёр улсын Ерөнхий сайд ганцаарчилсан уулзалт хийсний дараа Ерөнхий сайд нар албан ёсны хэлэлцээ хийлээ.

Ерөнхий сайд У.Хүрэлсүх өнгөрсөн оны нэгдүгээр сард БНСУ-д айлчлах үеэр, тус улсын Ерөнхий сайд Ли Наг Ёныг эх орондоо урьсан юм. Үүний дагуу БНСУ-ын Засгийн газрын тэргүүн Монгол Улсад энэ сарын 27-ныг хүртэл айлчлахаар өчигдөр орой 21.00 цагт "Чингис хаан" олон улсын нисэх онгоцны буудалд газардсан юм.

Айлчлалын хүрээнд, БНСУ-ын Ерөнхий сайд Ли Наг Ён Ерөнхийлөгч Х.Баттулга, УИХ-ын дарга Г.Занданшатар нарт бараалхах юм. 

Талууд айлчлалын үеэр Монгол Улс, БНСУ-ын харилцааг улс төр, батлан хамгаалах, худалдаа, хөрөнгө оруулалт, эдийн засаг, зам тээвэр, эрчим хүч, байгаль орчин, соёл, боловсрол зэрэг өргөн хүрээтэй салбарт гүнзгийрүүлэн хөгжүүлэх, иргэдийн солилцоог  дэмжих, олон улс, бүс нутгийн сонирхсон асуудлаар санал солилцоно.

Ийнхүү БНСУ-ын Засгийн газрын тэргүүн Монгол Улсад 4 жилийн дараа айлчилж байна. Өмнө нь буюу БНСУ-ын Ерөнхий сайд асан Хван Гё Ан 2015 оны арванхоёрдугаар сарын 15-17-нд Монгол Улсад албан ёсны айлчлал хийж байсан юм.