Юм эргэнэ гэж бас байх юм. Саяхан л "Сэтгүүлчид Зөрчлийн хуулийн гүтгэх заалтын золиос болж, үзэл бодлоо илэрхийлэх, хэвлэн нийтлэх эрхээ хасуулж байна" хэмээн эсэргүүцэж байсан. Улстөрчид, УИХ-ын эрхэм гишүүд энэ заалтыг "нохойд барьдаг мод" мэт сэтгүүлчдийн ам барих зэвсэг болгон хэрэглэж, дуртай үедээ дуртай сэтгүүлчээ "Энэ намайг гүтгэчлээ" гээд тэрийгээд уначихдаг болсон.
Тэгэнүүт нь ЦЕГ-ын "Олон нийтийн аюулгүй байдал, нийгмийн хэв журмыг хангадаг" нэг хэлтсийнхэн дор нь нөгөө сэтгүүлчийг барьж аваад хоёр саядаад, хорин саядаад явчихдаг. "Утсан хүүхэлдэй" гэж хэлээд л хоёр сая, "уяаны нохой" гэж хэлээд л хоёр сая. Нөгөө улстөрч нь жинхэнээсээ утсан хүүхэлдэй байсан уу, уяаны нохой болсон уу энэ тэр ямар ч хамаагүй шүү дээ.
Тэгсэн харин сүүл үеэс манай улстөрчид бие биенээ сайхан "гүтгэдэг" болсон байна. Гүтгэж байгаа байдал нь бол сэтгүүлчидтэй харьцуулахад хавьгүй мэргэжлийн түвшинд байгаа юм. Жишээ нь Т.Аюурсайхан гишүүн саяхан Швейцарийн банкийг "С.Баярцогтын нууц дансны мэдээллийг надад итгэж өглөө" хэмээн гүтгэсэн.
Түүнтэй хамт Швейцарийн парламентад айлчлаад ирсэн УИХ-ын гишүүн Б.Пүрэвдорж хариуд нь "УИХ-ын гишүүнд ийм эрх мэдэл байхгүй. Энэ бол хуулийн байгууллага хооронд явагдсан ажиллагаа" гэж бас "гүтгэв". Гүтгүүлсэн Т.Аюуртсайхан нь өнөөдөр дахиад хариу "гүтгэлэг" хийсэн сураг байна.
Гэтэл бас өчигдөр Монгол Улсын гурав дахь Ерөнхийлөгч асан Н.Энхбаяр “Цензургүй ярилцлага”-д оролцохдоо УИХ-ын дарга асан М.Энхболдыг "Эрдэнэтийн 49 хувь болон ХХБ-ны хувьчлалыг зохион байгуулсан, оролцсон, хувь амалсан" хэмээн ярьж, "ор үндэслэлгүйгээр дахин гүтгэсэн" байна. Тиймээс энэ гүтгэлгийг эсэргүүцэж хуулийн байгууллагад хандах болсон тухайгаа М.Энхболд гишүүн өөрийн твитер хуудсаар жиргэжээ.
Уг нь хэрвээ Н.Энхбаяр дарга УИХ-ын гишүүн, эсвэл сайд, дарга байсан бол энэ хэргийг ЦЕГ-ын "Олон нийтийн аюулгүй байдал, нийгмийн хэв журмыг хангадаг" хэлтэс тусгайлан авч, нямбайлан шалгадаг юм. Гэвч мань хүн одоохондоо аль нь ч биш болсон учраас дүүргийн цагдаа дээр л чулуу няслах нь дээ.
Б.ЗАЯА
Сэтгэгдэл (2)