Швейцарийн парламентын урилгаар тус улсад "аялан жуулчилсан" УИХ-ын гишүүдийн нэг Т.Аюурсайхан өөрийн твиттер хуудсаараа "Швейцарын Холбооны Улсаас "Credit Suisse AG" банк дахь С.Баярцогтын ам.долларын 3, еврогийн 2, нийт 5 дансны 2008.09.30-2013.12.31 хугацааны гүйлгээний дэлгэрэнгүй хуулгыг Монголын талд хүлээлгэж өгснийг өнөөдөр өглөө авч ирлээ. ГХЯ-аар дамжиж АТГ-т хүргэгдэж байна" хэмээн жиргэсэн билээ.

Гэвч энэ мэдээллийг түүнтэй хамт айлчилсан УИХ-ын гишүүн Б.Пүрэвдорж няцаалаа. Тэрээр "Бид онгоцоор хэний ч, ямар ч дансны хуулга, баримт бичиг авраагүй" гэв.

УИХ-ын гишүүн Б.Пүрэвдорж:

-Юуны өмнө авлигаар олсон мөнгөө оффшор бүсэд аваачиж нуудаг төрийн албан хаагчид, мөн Монголын газрын баялгаас олсон ашгаа татвараас нууж оффшорт хадгалдаг хэн бүхэнд таатай ханддаггүй гэдгээ хэлье. Бид айлчлалынхаа хүрээнд Швейцарийн банкинд, оффшор бүсийн банкинд данс эзэмшдэг Монголын нэг ч улстөрч битгий хэл иргэнтэй холбоотой асуудлаар хууль хяналтын байгууллагынхантай нь, бас банкныхантай огт уулзалт хийгээгүй. Швейцараас бид оффшор бүсэд данс эзэмшдэг хэний ч, ямар ч дансны хуулга, баримт бичиг авчраагүй. Энэ мэдээлэл худлаа.

-Таньтай хамт явсан зарим нэг гишүүн энэ мэдээллийг өөрөө авчирсан мэтээр олон нийтэд мэдээлээд байгаа?

-Айчлалаар явсан гишүүд онгоцоор авчирсан мэтээр ойлгогдох мэдээлэл тараасныг ойлгохгүй байгаа. Миний авсан мэдээллээр хоёр долоо хонгийн өмнө Гадаад харилцааны яаманд дипломат шуудангаар АТГ, Прокурорын байгууллагаас өмнө нь өгч байсан хүсэлтийн дагуу Швейцарийн холбооны улсаас тодорхой баримт ирсэн юм шиг байна лээ. Үүнийг л зарим нэг улстөрчид өөрсдөө аваад ирсэн юм шиг ярьж байгаа нь буруу гэж бодож байна. Тэгээд ч парламентын гишүүдэд тийм эрх байхгүй, энэ бол хууль хяналтын байгууллагын ажил. Улсын эдийн засгийг хүндрүүлэхэд хамгийн ноцтойгоор нөлөөлсөн оффшорчдод хариуцлага хүлээлгэх гэсэн хүсэл ард түмэнд байгаа. Энэ хүлээлтийг талаар өнгөрөөж болохгүй гэдэг байр суурьтай байдгаа дашрамд илэрхийлье. АТГ болоод хууль хяналтынхан баримт материалаа бүрдүүлж, ажиллаж байгаа гэж бодож байна.