Зам, тээврийн хөгжлийн яамны Төрийн захиргааны удирдлагын газрын дарга асан Б.Махбалд холбогдох хэргийн гэм буруугийн шүүх хуралдаан өнөөдөр болсон ч гэрчүүд дутуу гэдэг гэрчүүд дутуур ийнхүү гурав дахь удаагаа хойшиллоо. Өнөөдрийн шүүх хуралдаанд ЗТХ-ийн сайд асан Ж.Бат-Эрдэнэ, дэд сайд асан, Төрийн нарийн бичгийн дарга, тухайн үед хэргийн газарт байсан яамны бусад газрын дарга нар гээд 10 хүнийг гэрчээр дуудсан ч гурван хүн л ирсэн байна.

Тодруулбал, сайд асан Ж.Бат-Эрдэнэ ирээгүй байна. 

Уг шүүх хуралдаанд оролцохоор ирсэн ЗТХЯ-ны дэд сайд асан Б.Цогтгэрэл: "Ард түмэн нэг л зүйлийг ойлгох хэрэгтэй. Энэ бол ердийн нэг архидалт, хоёр хүний маргаан биш. Энэ бол ажил албан тушаал, хэсэг бүлэг хүний шуналтай л холбоотой бөгөөд талийгаач үүний л золиос болсон. Цаашдаа төрд ажиллаж байгаа хүмүүс юу анхаарах вэ гэдэг дээр энэ хэрэг том сургамж болох учраас шүүх хурлаас их зүйлийг хүлээж байна. Гэтэл тухайн үед шийдэл гаргаж байсан сайд нь ч ирсэнгүй шүү дээ. Гэрч нар ирээд гэрчлээд өгөх хэрэгтэй" гэв. 

Хохирогчийн өмгөөлөгч З.Хүрэлсүх: "Бид 10 гэрч, нэг шинжээч оролцуулах хүсэлт тавьсан. Өнөөдрийн шүүх хуралд гурван гэрч ирлээ. Хэрэгт Б.Махбалаас гадна хоёр хүнд холбогдох хэрэг үүсгэн шалгаж байсан. Прокурор тэр хоёр хүний хэргийг Нийслэлийн прокуророос хэрэгсэхгүй болгосон. Хэргийн анхнаас яригдаж байсан яллагдагчийн хувьд хэргийн зүйлчлэлийг хөнгөрүүлсэн. Хэргийг шүүхэд шилжүүлсэн эдгээр шийдвэрүүдийн аль алийг нь бид хүлээн зөвшөөрөхгүй. Эрүүгийн хуулийн 10.1 дүгээр зүйлийн нэг дэх хэсэг буюу ердийн хүн амины хэргийн ял шийтгэл 8-12 жил хорих ял. Харин 10.1 дүгээр зүйлийн хоёр дахь хэсэг хүндрүүлэх нөхцөл буюу хүний амь насанд санаатай халдсан бол 12-20 жил хорих эсхүл бүх насаар нь хорих ял оноодог. Ял шийтгэлийн хувьд асар их ялгаатай. Шүүх арга хэмжээ аваад бүх гэрчийг оролцуулаад шүүх хурлаа хийнэ гэж найдаж байна" гэв. 

Хохирогчийн өмгөөлөгчийн зүгээс дөрвөн хүнийг шинээр гэрчээр оруулах хүсэлт тавьсан ч шүүх хурал хүлээж аваагүй байна. Түүнчлэн прокуророос хэргийг шилжүүлсэн хуулийн зүйл хэсэг тохироогүй, хөнгөдсөн гэсэн байр суурьтай байгаа бөгөөд энэ шүүх хуралдааны бүрэлдэхүүнд л найдаж байгаагаа хэллээ. 

Шүүх хурал ирэх дөрөвдүгээр сарын 5-ны өдрийн 10.00 цагт болж хойшлолоо.

"Нийслэлийн прокурорын газраас яллагдагч Б.Махбалд холбогдуулан яллах дүгнэлт үйлдэж ирүүлсэн эрүүгийн хэргийг Сүхбаатар дүүргийн эрүүгийн хэргийн анхан шатны шүүх хүлээн авч хянаад: 

Хохирогчийн хууль ёсны төлөөлөгч У.Өнөрцэцэг шүүх хуралд ирээгүй, мөн хохирогчийн хууль ёсны төлөөлөгчөөс Эрүүгийн  хэрэг хянан шийдвэрлэх тухай хуулийн 34.16 дугаар зүйлийн 1.3 дахь хэсэгт зааснаар шүүх хуралдаанд шинээр өмгөөлөгч нэмж оролцуулах, хавтаст хэргийн материалтай танилцах үндэслэлээр хүсэлт ирүүлсэн байх тул шүүхээс яллагдагч Б.Махбалд холбогдох эрүүгийн хэргийн  шүүх хуралдааныг  2019 оны 04 дүгээр  сарын 05-ны 10:00 цаг хүртэл хойшлууллаа" гэж шийдвэр гаргажээ.