Швед болон Норвегийн парламент 16 настай Грета Тунберг гэх сурагч охиныг дэлхийн цаг уурын өөрчлөлттэй идэвхтэй тэмцсэнийх нь төлөө Нобелийн энх тайвны шагналд нэр дэвшүүлсэн байна.
Сурагч охин өнгөрсөн наймдугаар сараас эхлэн долоо хоногийн баасан гариг бүрт Стокгольм дахь парламентын ордны гадаа дэлхийн уур амьсгалын өөрчлөлтийн эсрэг хичээл хаялт зохион байгуулж байгаа юм. Тэрээр дэлхийн уур амьсгалын тухай Парисын гэрээнд заасан шаардлагуудыг биелүүлэхийг засгийн газраас шаардсан бөгөөд түүний шаардлагыг биелүүлэхээс нааш баасан гариг бүр хичээлдээ суухгүй гэдгээ мэдэгдэж байжээ. Үүний дараа дэлхийн олон орны сурагчид Гретагийн санаачилгыг дэмжиж, ижил төрлийн жагсаал, цуглаан зохион байгуулж эхэлжээ. Тухайлбал өнөөдөр буюу гуравдугаар сарын 15-нд дэлхийн 105 улсад олон мянган сурагчдыг хамарсан асар том "хичээл хаялт" зохион байгуулагдах юм байна.
Норвегийн улстөрч Фредди Андре, “Дайн, олон улсын мөргөлдөөн, дүрвэгсдийн асуудлаас үүдэн гарч буй уур амьсгалын өөрчлөлтийг зогсоохын тулд бид юу ч хийж чадахгүй байна. Харин Грета Танберг олон нийтийн хөдөлгөөн өрнүүлж, цаг уур өөрчлөлтийн эсрэг үнэтэй хувь нэмэр оруулж байгаа учраас түүнийг энэ шагналд нэр дэвшүүлсэн” гэж хэлжээ. Тэрээр 2017-2021 оны хооронд Норвегийн парламентад ажиллахаар сонгогдсон 24 настай залуу улстөрч юм.
Сонирхуулахад 2018 онд Грета Тунбергийг дэлхийн уур амьсгалын өөрчлөлтийн тухай түүнийг яриулахаар НҮБ болон Давос дахь Олон улсын эдийн засгийн чуулганд оролцохыг урьж байжээ. Түүний оролцсон TED Talk-ийг та бүхэн эндээс үзэх боломжтой.
Дашрамд дурдахад, 2014 онд охидын сурах эрхийн төлөө тэмцэгч Малала Юсуфзай Нобелийн Энх тайвны шагналыг 17 настайдаа хүртэж, хамгийн залуу Нобелийн шагналтнуудын нэг болж байсан юм. Энэ жилийн тухайд тус шагналд 300 орчим хувь хүн, байгууллага нэр дэвшиж байгаа аж.
