Нойр нь хүний ажиллах чадамжийг тасралтгүй хангаж байдаг бие махбодийн хамгаалагч юм. Гэвч харамсалтай нь дэлхийн нийт хүн амын 45 хувь нь ямар нэгэн байдлаар нойрны асуудалтай тулгардаг гэсэн судалгаа байдаг ажээ.

Жил бүрийн гуравдугаар сарын хоёр дахь бүтэн долоо хоногийн баасан гаригийг дэлхийн "НОЙР"-ны өдөр болгон тэмдэглэдэг бөгөөд Олон улсын нойр эмчилгээний холбооны (World Sleep Day Committee) санаачилгаар 2008 оноос эхлэсэн байна.

Энэ өдрөөр хүн сайн нойр авахын ач тусыг таниулж, сурталчах, түүнчлэн олон хүнд тулгардаг нойрны хүндрэл, нойргүйдлээс хамгаалж, нойргүйдэлтэй холбоотой өвчлөлөөс урьдчилан сэргийлэх талаарх иргэдийн ойлголтыг нэмэгдүүлэх, энэ талаарх мэдээ мэдээллийг олон нийтэд түгээх зорилготой өнгөрүүлдэг байна. 

Тэнцвэртэй хооллож, өдрийн горимыг зөв зохион байгуулж, хангалттай хугацаагаар унтаж байх нь бие, сэтгэцийн эрүүл мэндийг олон жилээр хадгалах зайлшгүй шаардлагатай нөхцөл мөн юм.

Хүн дунджаар амьдралынхаа гуравны нэгийг унтаж өнгөрүүлдэг бөгөөд удаан хугацаагаар дутуу нойртой байх нь амьдралын чанарт сөргөөр нөлөөлж, тодруулбал хошин шогийн мэдрэмж байхгүй, цухалдуу, зожиг болдог аж.

Эл өдрийг "Дэлхийн нойрны өдрийн холбоо" болон "Дэлхийн унтах анагаах ухааны дэлхийн холбоо" хамтран 2008 оноос хойш ийнхүү тэмдэглэж, нийгэмд ойлголтыг түгээж иржээ.

Нойртой холбоотой зарим сонирхолтой судалгаанаас дурдвал:

• Сайн, хангалттай нойр авснаар альцгеймер, сэтгэл гутрал, даралт ихсэх, цус харвах зэрэг олон төрлийн өвчнөөс урьдчилан сэргийлэх боломжтой,
• Инсомниа буюу нойргүйдэлд дэлхийн нийт насанд хүрэгсдийн 30-45 хувь нь өртдөг ба түүнийг дагаад улс орны эдийн засагт сөрөг нөлөө үзүүлдэг гэсэн тооцоо гарсан байдаг,
• Жил бүр дэлхий дахинд дутуу нойртой жолооны ард сууснаас болж 71,000 орчим зам тээврийн осол, гэмтэл гардаг,
• Түүнчлэн сайн нойр авч чаддаггүй насанд хүрэгсдийн 46 хувь нь ажил, албаа таслах магадлалтай байдаг зэрэг олон төрлийн судалгаа олон улсад гарсан байдаг.

Эрдэмтдийн үздэгээр, насанд хүрсэн хүний унтах хамгийн зохистой хугацаа нь хоногт 7-8 цаг байдаг байна. Эмэгтэйчүүд нэг цагаар илүү унтах шаардлагатай, учир нь тэд илүү сэтгэлийн хөөрөлтэй байдаг гэж зарим мэргэжилтэн үздэг. Бие махбодийн үйл ажиллагаа хэвийн байхад нь хүүхэд хоногт 10 цагаас багагүй унтах шаардлагатай гэж үздэг байна.