Станд-апп комеди хэмээх хошин урлагийн төрлийг Монголдоо амжилттай хөгжүүлж буй "UB Comedy" клуб өнгөрсөн нэгдүгээр сард 5 жилийнхээ ойг тэмдэглэсэн. Энэ хугацаанд үзэгчдийн талархалыг хүлээсэн олон чадварлаг комедианыг төрүүлж, олны дунд багагүй танигдсан билээ. 

"UB Comedy" клубын үүсгэн байгуулагч Б.Батбилэг өнөөдөр мэдэгдэл хийж, зарим гишүүд гэрээгээ цуцалж, клубээсээ гарахаар болж буй талаар дуулгалаа. Тэрээр "Анх комеди хийж эхлэхдээ бизнес гэхээсээ зүрх сэтгэлээрээ татагдсан урлаг байсан. Ийм учраас эхэндээ тоглолтууд маань үнэгүй явагддаг байлаа. Яваандаа энэ нь зах зээлийн жамаар бизнес болохоос өөр аргагүй болсон. Иймээс би компаниа байгуулж, уран бүтээлчидтэйгээ гэрээ байгуулан ажилласан. Бүх амь амьдралаа клубтээ зарцуулдаг байсан. Хажуугаар нь давхар ажил хийж байгаагүй... Өмнө нь бүх орлогоо хувааж авдаг байсан бол компани байгуулагдсанаар орлогын тал хувийг цаашдын хөрөнгө оруулалтад зарцуулж, үлдсэнийг нь гэрээний дагуу уран бүтээлчиддээ олгож байсан. 2017 онд "Сант Асар" төвийн хоёр давхарт "UB Comedy" клубээ нээж байсан бол 2018 оны оны нэгдүгээр сараас гуравдугаар сар хүртэл хоёр дахь удаагаа засвар хийж сайжруулсан. Үүнийг хийхийн тулд би хувиасаа болон компаниасаа мөнгө гаргаж, гэр бүлээсээ ч санхүүгийн дэмжлэг авсан. Уран бүтээлчид үүнд хөрөнгө оруулалт хийгээгүй. Үүнээс хойш анх уран бүтээлчидтэй хийсэн тохиролцоо явцгүй болж эхэлсэн. Компани бүх хөрөнгө оруулалтыг хийж, зарлага гаргаж харин уран бүтээлчид зардлын дараах ашиг бус шууд орлогоос авч байсан... Одоогийн байдлаар манай компани 40 орчим сая төгрөгийн алдагдалтай ажиллаж байна. Тиймээс хөрөнгө оруулалтаа нөхөж, санхүүгийн хувьд эрүүл болгохын тулд уран бүтээлчиддээ гэрээгээ шинэчлэх санал тавихад зарим залуус маань гэрээгээ цуцлахаар болсон. Би арай ч ийм олуулаа гарч явна гэж санаагүй" гэсэн юм. 

Энэхүү мэдэгдлийн дараа "UB Comedy" клубын комедиан Б.Идэр-Од шинээр байгуулагдсан "Comedy Lab Club"-ийн залууст амжилт хүссэн пост оруулжээ. 

ub.life