ХХБ-ны ТУЗ-ийн дарга Д.Эрдэнэбилэг, Гүйцэтгэх захирал О.Орхон, “Монголиан коппер корпорейшн” ХХК-ийн Гүйцэтгэх захирал Ц.Пүрэвтүвшин нарыг өчигдөр орой буюу гуравдугаар сарын 5-ны 22 цагт Эрүүгийн цагдаагийн албанаас урьдчилан хорих 461 дүгээр хорих ангид баривчлан саатуулаад байгаа. Тэднийг яг ямар үндэслэлээр гэрээс нь дайчлан баривчилсан талаар тодорхой мэдээлэл хийгээгүй, зөвхөн "албадан авчирч байцаалт авсан" гэсэн билээ.

Харин оройн 22 цагийн орчимд "Яллагдагчаар татаж саатуулахаар болсон. Баривчлан саатуулах хүсэлтээ Нийслэлийн прокурорт гаргасан. Өнөөдөр ажлын цаг дууссан тул прокурорын шүүх хүсэлт явуулах боломжгүй байна. Маргааш ажлын цаг эхлэхээр шүүхийн захирамж гарна гэсэн билээ.

Гэвч өнөөдөр авсан мэдээллээр Д.Эрдэнэбилэг, О.Орхон, Ц.Пүрэвтүвшин нарыг баривчлан саатуулах асуудлаар прокурорын байгууллагаас шүүхэд хүсэлт ирүүлээгүй байна. Хоёрдугаарт одоогоор УЕП нийслэлд байхгүй байгаа тул цагдан хорих, саатуулах асуудлаар прокурорын байгууллагын шийдвэр гарсан эсэх ч эргэлзээтэй байна.