НИТХ-ын ээлжит бус хуралдаан сая өндөрлөж, Нийслэлийн Засаг дарга бөгөөд Улаанбаатар хотын захирагчаар С.Амарсайханыг сонгосон тухай тооллогын комиссийн дүнг танилцууллаа. Санал хураалтад 45 төлөөлөгч оролцсоноос нэг санал хүчингүйд тооцогдож, С.Амарсайханы төлөө 25 төлөөлөгч (56,8 хувь) С.Мөнхчулууны төлөө 19 төлөөлөгч (43.1 хувь) санал өгсөн байна. 

Олонхийн санал авсан С.Амарсайханыг Нийслэлийн Засаг даргаар батламжлуулах тухай НИТХ-ын тогтоолыг Ерөнхий сайд У.Хүрэлсүхэд хүргүүлэхээр шийдвэрлэрснээр өнөөдрийг хуралдаан өндөрлөв. Өглөө 11.00 цагт эхэлсэн НИТХ-ын ээлжит бус хуралдаан дөрвөн удаа завсарласны эцэст сая шийдвэрээ гаргалаа.

Сануулахад НИТХ-ын дарга С.Амарсайханыг Нийслэлийн Засаг даргад нэр дэвшүүлэх тухай НИТХ дахь МАН-ын бүлгийн шийдвэрийг МАН-ын Удирдах зөвлөл 100 хувиар дэмжиж, өмнөх хуралдаанд оруулсан юм. Гэвч С.Амарсайхан олонхийн санал авч чадалгүй ялагдаж, заалнаас нэрээ дэвшүүлсэн С.Мөнхчулуун ялалт байгуулан Нийслэлийн Засаг дарга бөгөөд Улаанбаатар хотын захирагчаар сонгогдсон билээ. Гэвч НИТХ-ын энэ шийдвэрийг Еоөнхий сайд У.Хүрэлсүх батламжлахаас татгалзсан тул өнөөдөр дахин санал хураалт явуулахад хүрсэн юм.