Маргааш болох НИТХ-ын ээлжит бус хуралаанаар Нийслэлийн засаг дарга бөгөөд Улаанбаатар хотын захирагчийг томилно. Өмнөх хуралдаанаар НИТХ дахь МАН-ын бүлэг С.Амарсайханыг нэр дэвшүүлэн өрсөлдүүлсэн боловч олонхийн санал авч чадалгүй унаж, заалнаас нэрээ дэвшүүлсэн С.Мөнхчулуун олонхийн санал аван ялалт байгуулсан билээ. С.Мөнхчулууныг Нийслэлийн Засаг даргаар томилуулах тухай НИТХ-ын хурлын шийдвэрийг батламжлуулахаар Ерөнхий сайдад хүргүүлснээс хойш хоёр сарын дараа буюу энэ сарын 16-нд  Ерөнхий сайд У.Хүрэлсүх түүнийг батламжлахаас татгалзаж буйгаа албан бичгээр хүргүүлсэн байдаг. 

Ерөнхий сайдын энэ шийдвэрийг эсэргүүцэж С.Мөнхчулуун "Дахин нэрээ дэвшүүлж өрсөлдөнө" гэснээс болж НИТХ-ын дарга асан Ц.Сандуй болон төлөөлөгч С.Мөнхчулуун нарыг МАН-ын гишүүнээс түдгэлзүүлсэн Хяналтын хорооны шийдвэр хүртэл гараад байгаа.     

Ингэхдээ МАН-ын Үндсэн дүрмийн “Намын эв нэгдлийг хамгаалах, намын эрх ашигт үл нийцэх улс төрийн үйл ажиллагааг шүүмжлэн няцаах үүргээ биелүүлээгүй гэж үзсэн бол гишүүнд улс төрийн дараах дэмжлэг үзүүлэхээс тодорхой хугацаагаар татгалзана” гэдэг заалтыг үндэслэл болгосон байдаг.

Гэвч маргааш болох хотын даргын сонгуульд С.Мөнхчулуун дахин нэрээ дэвшүүлэхээ мэдэгдээд байна. Мөн энэ асуудалтай холбогдуулж УИХ-ын гишүүн Н.Номтойбаяр “Нийслэлийн Засаг даргад нэр дэвшигч С.Мөнхчулуун МАН-ын дарга У.Хүрэлсүхэд таалагдаагүй нь түүнийг өөрийн гэсэн бодлого, зарчимтай гэдгийг тодорхойлно. Xар дансанд орсон би намгүй болсон C.Мөнхчулууныг дэмжинэ. “Бодлого” гээчийг нь cөрж дахин нэр дэвш! Амжилт хүсье" гэжээ. Мөн нийслэлийн Засаг даргын үүргийг түр орлон гүйцэтгэгч Ж.Батбаясгалан түүнийг нэр дэвших боломжтой гэдгийг мэдэгдээд байгаа юм.