Өчигдөр Монгол Улсын дөрөв дэх Ерөнхийлөгч Цахиагийн Элбэгдорж "зангиагаа зүүгээд, гутлаа тослоод" АТГ-ыг зорьж, мэдүүлэг өгсөн. Түүнийг мэдүүлгээ өгсний дараа хэвлэлийнхэн тодруулга авсан байна.

-Таныг ямар шалтгаанаар АТГ-аас дуудсан юм бэ?

-Тавантолгойн орд газартай холбогдсон асуудлаар дуудаж асуулаа. Тавантолгойн асуудлаар Ерөнхийлөгчийн бүрдүүлж өгсөн материалтай холбоотой асуудлаар гэрчийн мэдүүлэг авсан. Хуулийн өмнө бүгд эрх тэгш байх ёстой. Хуулийн засаглалд монголчууд бүгдээрээ итгэх ёстой гэж л бодож явдаг. Нэгдүгээрт, албан тушаалтнууд хуулиас зугтаж болохгүй. Хууль дуудсан бол ирж байх ёстой.

-ШХАБ-ын асуудлаар таны байр суурь энд дуудагдахад хүргэсэн үү?

-ШХАБ-ын асуудлаар асуугаагүй. Миний байр суурь бол Монгол Улс ШХАБ-д гишүүнээр элсэж болохгүй. Монголын ард түмний эрх, эрх чөлөө, бие даасан байдалд аюул учруулна.

-Та Ерөнхийлөгч Х.Баттулгаас 178 хуудас материалаа ил болгохыг шаардсан. Одоогоор ил тод болгоогүй байна. Та өөрөө энэ материалтай танилцав уу?

-Би тэр 178 хуудас материалтай танилцаагүй. Хавтаст хэрэгт хийсэн байгаа. Би Ерөнхийлөгчид 178 хуудас материалаа ард түмэн, хэвлэл мэдээлэлд ил болгооч гэсэн хүсэлт тавьж байгаа. Нууц зүйл байх ёсгүй.

-Та цаазын ялын эсрэг олон улсын хуралд явна гэж байсан. АТГ-т дуудагдсан тань үүнд саад учруулах уу?

-Цаазын ялын олон улсын комисс гэж бий. Дэлхийн конгресс гэж болно. Би тийшээ яваад ирнэ. Санаа зовох шаардлагагүй. Хурдан яваад ирнэ.

-Та яг одоо юунд санаа зовж байна?

-Миний санаа зовж байгаа зүйл бол бид бүхэнд гамшиг учруулж байгаа утааны асуудал байна. Энэ чиглэлээр иргэнийхээ хувьд хийхээр бодож буй зүйл бий.

-АТГ танаас тайлбар, мэдүүлэг авсан нь эрүүгийн хэрэг үүсгэх шалтгаан болж магадгүй. Та цаашид дуудсан цагт ирэх үү?

-Ирэлгүй яахав. Хуулийн байгууллага асууя, тодруулья гэвэл дуудсан цагт ирнэ. Хаана ч явж байсан хамгийн хурдан ирнэ. Хуулиас, хуулийн байгууллагаас зугтах ямар ч шаардлага надад байхгүй. Яг ийм байдлаар хүн бүр хуулийн байгууллагын ажил хүндэтгэлтэй хандах ёстой. Монгол Улсын хууль бол миний хувьд хамгийн том хүч.

-Монголын төр зүтгэсэн хүндээ хатуу байдаг юмаа гэж та хэлж байсан. Хуулийн байгууллагын энэ удаагийн үйлдэлд эмзэглэж байна уу?

-Үгүй үгүй. Хуулийн байгууллага шаардлагатай бол албан тушаалтнуудыг бүрэн эрхийнх хугацаа дууссаны дараа асууж, тодруулга авч болно. Энэ бол хуулийн байгууллагын бүрэн эрхийн асуудал.