БСШУС-ын сайд асан Ц.Цогзолмааг албан тушаалаас нь огцруулахаар УИХ-ын чуулганаар хэлэлцэж байх үед Ерөнхий сайд У.Хүрэлсүхээс сайд асан нэг л зүйлийг хичээнгүйлэн гуйж билээ. Төрийн нарийн бичгийн даргаар ажиллаж байгаа Б.Баярсайханыг энэ яамнаас аль болох хурдан зайлуулаарай. Төрийн алба хаших ёс зүйгүй хүн шүү гэж.

Үүний араас төрийн нарийн бичгийн дарга Б.Баярсайхан өөрийн биеэр залруулга хийж, "ёс суртахуунтай" гэдгээ зарласан авч сайд асан, төрийн нарийн хоёрын зарга дуусаагүй бололтой. Саяхан Б.Баярсайхан нь сайд асан Ц.Цогзолмааг хэвлэлийн төлөөлөгчөөрөө дамжуулан яамны төсвөөр сэтгүүлчидтэй гэрээ байгуулж,  өөрийг нь гүтгэж гүжирдсэн мэдээ, мэдээллийг хэвлэл мэдээллийн хэрэгслээр тараасан хэргээр цагдаад өгч, сайдын хэвлэлийн төлөөлөгч энэ хэргийн улмаас цагдаад мэдүүлэг өгсөн байна. Энэ тухай хэвлэлийн төлөөлөгч асан Dariya Urnaa гэх эмэгтэй өөрийн фейсбүүк хуудсаар дамжуулан Төрийн нарийн бичгийн дарга Б.Баярсайханд ханджээ. Тэр өнөөдөр өглөө нүүр номдоо инйнхүү бичсэн байна.  

"Уржигдар СБД-ийн цагдаагаас ярив. Таныг 115 сая төгрөгийн гэрээ хийж өөрийг нь гүтгэсэн гэдэг үндэслэлээр Б.Баярсайхан гэдэг хүн гомдол мэдүүлсэн, та ирж мэдүүлэг, тайлбар өгнө үү? гэлээ. Тэмээ хариулсан хүн буурныхаа занг андахгүй гэгчээр олон тайлбаргүй ямар гээч дуудлага болохыг мэдлээ л. Өчигдөр очиж байцаалт, мэдүүлгээ өгөв.

Миний бие 2018.03.01-ний өдөр БСШУСЯ-нд хэвлэлийн төлөөлөгчөөр ажилд орсон байдаг юм. 4-р сард тухайн үед ТНБД-ын үүргийг түр орлон гүйцэтгэгч Л.Цэдэвсүрэнгийн өгсөн чиг үүргийн дагуу яамны бодлого ү/а-г сурталчлах зорилго бүхий гэрээг 5-р сард 48 байгууллагатай хийв. Нийт үнийн дүн нь 115 сая төгрөг. Би ч биш ТНБД баталж, ТЗУГ-ын дарга байгуулдаг гэрээ л дээ. 
Энэхүү гэрээгээр дамжуулж сайд Ц.Цогзолмаа бид 2 нөхөр ТНБД Б.Баярсайханыг гүтгүүлж, өөрсдийгөө өмгөөлүүлж, магтуулсан юм байх. Ийм утгатай юм яриад явдгийг нь зөндөө л дуулж байсан, гэхдээ арай цагдаад гомдол болгоод өгчихнө гэж зүүдлээчгүй л дээ. Өгөх өгөхдөө 5 бүлэг бүхий гомдол мэдүүлсэн байгаам.

5 дахь бүлэг нь ихээхэн ноцтой. Алдарт бандааш тайлсан явдал нь олон нийтэд ил болоход намайг буруутгаж хамт олны өмнө намайгаа элдвээр чичилж, хөөж тууж байсан бол цагдаад өгөхдөө САЙДАД хэргээ тохсон байгаа юм. Намайг бол гэрээ хийсэн ХМХ-үүдтэйгээ хамтарч өөрийг нь гүтгэсэн, үйл ажиллагаа явуулдаггүй, редакцигүй сайтуудтай гэрээ байгуулсан гэж "яллаж"... Агуу л даа. Энэ хүний тухай ӨӨР хэлэх сайн ч, муу ч үг үнэхээр олддоггүй. Алдартай заргач гэдгийг нь мэднээ. Энэ тухай факт ярья гэвэл жагсааж чадна. Гэхдээ Б.Баярсайхан шиг этик бидэнд байхгүй!

Нэг л зүйл хэлмээр байна. Хүн заргач байж болно. Завхай ч байж болно. Толгой муутай байж болно. Сайхан бие хаатай ч байж болно. Хувь хүний мөн чанар, өгсөн өгөгдөл, амьдрах арга замыг шүүх, элдвээр гоочлох эрх бидэнд байтугай бурханд байхгүй. Гагцхүү төрийн албанд хариуцлагатай өндөр алба хашдаг, олон нийтэд үйлчлэх үүрэгтэй хүнд олон нийтийн өмнө хүлээсэн үүрэг, хариуцлага, ёс зүйн хэм хэмжээ гэж чухал юм бий.

Ийм жижиг тархитай, ийм их завтай, ийм увайгүй, өөрийн бодол, таамгаа үнэн мэт итгэж юу тааралдсанаа зарга болгож, заалдаж явдаг этгээд Монгол ТӨРИЙН АЛБАНД зайдалчихаад, албан тушаалаа эрх мэдэл, ашиг хонжоо гэж харж байгаа нь харамсалтай. Чухам энэ л монгол төрийн эмгэнэл юм.

Та миний, бидний бөгсийг ухаад ухаад юу ч олж долоохгүй, Б.Баярсайхан даргаа! Яагаад гэвэл бид тань шиг гэрээ хийсэн хэвлэлээрээ дамжуулж хэн нэгнийг гүтгэж, доромжилдоггүй! Тань шиг албан тушаалаа эрх мэдэл гэж андуурч төрийн мөнгийг хувийн жижиг эрх ашигтаа зориулж явсангүй! Тиймээс үнэхээр заргалдъя, заалдъя гэж байвал өөрөөр ярьж болноо. Дуугай байгааг, таны талаар зарга мэдүүлэхгүй байгааг айж эмээж байгаа явдал гэж битгий андуураарай. Зүгээр л бидэнд тийм этик болоод зав байдаггүй юм" гэсэн байна.