УИХ-ын гишүүн Ж.Ганбаатар сонгогдсон тойргийнхоо ахмадуудад бэлэг тараана, мөнгөн сугалаатай хэмээн Улаанбаатар паласт олон мянган хүн цуглуулж, Ерөнхий сайд У.Хүрэлсүх ч энэ боломжийг яаж алдах вэ хэмээн дагаж очсон байна. Хууль зөрчигсөдтэй сэлэм эргүүлэн тэмцэж байгаа, надаас өөр хүн ингэж тэмцэж байгаагүй хэмээн өөрийгөө өргөмжлөн магтсан У.Хүрэлсүхийн сунжирсан урт ярианы дараа бэлэг түгээхэд хөгшид өөд уруугүй зүтгэснээс болоод 83 настай нэгэн унаж хүний хөлд дарагдан амьсгал хураасан эмгэнэлт хэрэг гараад байгаа.
Алив нэгэн арга хэмжээг муу зохион байгуулснаас хүний амь нас эрүүл мэндэд аюул учрахад хэн хариуцлага хүлээх ёстой вэ. Шахцалдаж чихэлдсэн олон хүнээс хэн хэн тэр хөөрхий хөгшний дээр гишгэсэн байна гэж мөрдөн шалгах уу, бэлэг тарааж байсан хүнийг буруутгах уу. Эсвэл тэнд очсон талийгаачийг буруутгах уу....
Уг нь гэртээ зүгээр л цагаан сардаа бэлтгээд сууж байсан хөөрхий настныг ир ир гэж урилга заллага явуулан байж очуулаад өөрсдийн хариуцлагагүй байдлаас болж хүний амь нас эрсдэхэд хүргэсэн, УИХ-ын гишүүний үүрэг эрхэд хамааралгүй ажил зохион байгуулж, бэлэг сэлт тараасан УИХ-ын гишүүн Ж.Ганбаатар, Ерөнхий сайд У.Хүрэлсүх нар хариуцлага хүлээх ёстой баймаар. Гэтэл өнөөдөр тэд хийх ёстойгоо л хийсэн мэтээр талийгаачийн ар гэрт ч эмгэнэл илэрхийлээгүй, дэмжлэг туслалцаа ч үзүүлэлгүй, болох ёстой юм болоод л өнгөрсөн юм шиг таг чиг сууцгааж байж таарах уу...
"Ардчилал таймс" сонин
