Монголын соёлын биет бус өвийн олон төрөл зүйл, угсаатны бүлгийн онцлогийг таниулан сурталчилдаг “Нүүдэлчин” фестивалийг энэ удаад дэлхийн 190 гаруй орны төлөөлөгч үзэж сонирхоно.

Нийслэлийн Налайх дүүрэгт наймдугаар сарын 21-23-нд өдөр зохион байгуулах тус фестивалийн зочид нь Цөлжилттэй тэмцэх тухай НҮБ-ын Конвенцын Талуудын 17 дугаар бага хурал буюу СОР17-гийн төлөөлөгчид юм.  “Эх байгалиа сэргээе, Итгэл найдвараа бадраая” уриан дор энэ сарын 17-28-нд болох СОР17 хуралд 190 гаруй орны 5 мянга орчим төлөөлөгч оролцож, цөлжилт, газрын доройтол, ган, бэлчээр зэрэг хүн төрөлхтний өмнө тулгамдаж буй байгаль орчны сорилт, тэдгээрийг шийдэх, давж гарах арга замыг хэлэлцэх билээ. 

Монгол Улсад оршин буй угсаатны бүлгүүдийн соёлын биет бус өвийн онцлогийг таниулах, байгаль, уур амьсгалын өөрчлөлттэй зохицон амьдрах түүнтэй харилцан шүтэлцэж ирсэн уламжлалт мэдлэг, арга ухааныг түгээх зорилготой “Нүүдэлчин” фестивалийн үеэр аймаг, нийслэлийн отог, “Соёлын өвийн өртөө”, “Нүүдэлчдийн ертөнц: Өнгөрсөн ба ирээдүй” олон улсын эрдэм шинжилгээний хурал, “Жуулчны хоолны гудамж”, “Жижиг дунд үйлдвэрлэлийн” үзэсгэлэн худалдааг зохион байгуулна. Энэ удаагийн “Нүүдэлчин” фестиваль нь уур амьсгалын өөрчлөлттэй холбоотой агуулгад ач холбогдол өгч, монголчууд байгальтайгаа хэрхэн шүтэлцээтэй амьдардаг, эх дэлхийгээ хайрлаж, хамгаалж ирсэн уламжлалт ухаан, нүүдлийн соёлыг шингээхийг зорьсныг СОР17 Үндэсний хорооны ажлын албаны Соёл, аялал жуулчлалын хөтөлбөр, зочид буудал хариуцсан дэд хорооноос мэдээлэв. Мөн СОР17 хуралд хүрэлцэн ирсэн төлөөлөгчдийг хүлээн авч, аялалд хамруулахаар 85 жуулчны баазыг бэлдэн, одоогоор мянга орчим ор захиалаад байгаа ажээ.

СОР17 хурлын үеэр соёлын хөтөлбөрийн хүрээнд “цэнхэр”, “ногоон” бүсэд монголын өв соёл, урлагийг сурталчлах тоглолт, үзэсгэлэн, соёлын олон үйл ажиллагаа өрнүүлж, үүнд Үндэсний урлагийн их театр, Улсын драмын эрдмийн театр, Монголын уран зургийн галерей болон музей, соёлын өвийн байгууллагуудын хамтарсан тоглолт, үзэсгэлэн зохион байгуулахаар төлөвлөжээ.